Според него, најдобрата одбрана од лажните вести е навременото пласирање на точните информации, како начин навремено да се одговори на сите прашања што постојат на одредена тема. Сепак, голем дел од лажните вести што се пласираат во јавноста, според министерот за внатрешни работи, се резултат на хибридна војна што се води не само на територијата на Северна Македонија туку и генерално на Балканот
Демократијата подразбира можност да се пласираат мноштво информации, но добро би било тие информации да бидат проверени, вистинити и точни за јавноста да биде вистински информирана, посочи во денешното интервју за утринската програма на националната телевизија министерот за внатрешни работи Оливер Спасовски.
„Користењето на социјални медиуми и мноштвото онлајн платформи, генерално, им создадоа простор на многу луѓе да изнесуваат ставови, што и не е така лошо… Меѓутоа, сметам дека постои голема злоупотреба во тој медиумски простор, од една страна, а од друга – она што мене најмногу ми пречи – е што некои се изедначуваат со новинарите, иако немаат допирни точки со таа професија“,
истакна министерот Спасовски.
Според него, најдобрата одбрана од лажните вести е навременото пласирање на точните информации, како начин навремено да се одговори на сите прашања кои постојат на одредена тема. Сепак, голем дел од лажните вести што се пласираат во јавноста, според министерот за внатрешни работи, се резултат на хибридна војна што се води не само на територијата на Северна Македонија туку и генерално на Балканот, особено по отпочнување на војната во Украина, односно инвазијата на Русија, и тоа не само од лица кои од нивни лични причини тоа го прават, туку многу лажни вести се пласираат со цел да се влијае врз граѓаните, да се насочува нивното мислење.
„Затоа важно е постојано да бидеме во комуникација со граѓаните, постојано да ги пласираме точните информации, а јас сум им преблагодарен на сите медиуми, сите медиумски работници коишто ги бараат одговорите таму каде што можат вистински да ги најдат и ги пласираат во јавноста. Зашто само така заедно ќе си помогнеме. Можеби во даден момент, на краток рок не сфаќаме колку е штетно да се пласираат лажни вести, генерално, за функционирање на државата, на системот, но добро е секој од нас да придонесе барем малку во таа борба со лажните вести, за да можеме да воспоставиме одбранбен механизам кој сите нас ќе нѐ штити“,
порача министерот Спасовски.