Министерот за внатрешни работи, од позиција на потпретседател на владејачката партија, оцени во Делчево дека оваа владејачка гарнитура реализираше една од стратешките цели на земјата – влезот во НАТО со, како што рече, заштитен македонски јазик и идентитет
Во НАТО влеговме како Македонци, со македонски идентитет и со македонски јазик. Да знаете дека сега сме мотивирани како никогаш претходно. И покрај сите блокади и удари кои ни ги нанесуваат, како Влада преземаме одговорност дека ќе ги започнеме преговорите со ЕУ и ќе влеземе во ЕУ како Македонци, со македонски идентитет и со македонски јазик. Од тоа не отстапуваме, изјави министерот за внатрешни работи Оливер Спасовски, потпретседател на СДСМ, на партиска трибина во Делчево.
Спасовски рече дека Владата на СДСМ, уште во првите денови од мандатот, јасно ги поставила своите цели што во овие четири години, според него, се реализирани во целост.
На една од серијата трибини насловени „Најдоброто за нашата општина“, Спасовски рече дека оваа владејачка гарнитура реализираше една од стратешките цели на земјата – влезот во НАТО со, како што рече, заштитен македонски јазик и идентитет.
„Го воспоставивме концептот ‘Едно општество за сите’ и тука не мислиме на тоа кој на која вера или нација припаѓа, туку говориме за подеднаков пристап до институциите, и за оние кои живеат во селата и во градовите, и заоние кои се со основно и оние со високо образование, и за младите и за повозрасните“,
рече Спасовски.