Не знам дали е идеално време јуни, но поради најавите дека е можно да се врати кризата по септември, мислам дека е неопходно изборите да се одржат што е можно побрзо, затоа што на државата ѝ се потребни функционални институции, вели техничкиот премиер
Избори ќе има, само прашање е кога и тоа ќе го одлучиме на лидерската средба на 12 мај, а одлуката пред се ќе се базира на интересите на државата и на граѓаните, при тоа оставајќи ги на страна сите политички интереси кои ги имаме и ќе биде детерминирана од развојот на здравствената криза, порача денеска премиерот Оливер Спасовски.
„Времето на пандемијата и здравствената криза и на се она што ни се случува во државата бара висока политичка одговорност. Очекувам дека на лидерската средба ќе се постигне договор во однос на одржувањето на изборите кога впрочем тоа и е можно врз основа на сите правни активности“,
рече Спасовски.
Одлуката за датумот на изборите, како што рече, ќе треба да се донесе врз основа на стручните анализи на Комисијата за заразни болести.
„Не знам дали е идеално време јуни за да се одржат парламентарните избори, но заради најавите дека е можно да се врати оваа криза уште еднаш по септември, мислам дека е неопходно да се одржат што е можно побрзо, имајќи предвид дека на државата и се потребни функционални институции кои ќе можат да носат одлуки за сите прашања кои се во интерес на граѓаните“,
посочи Спасовски.
Сепак, нагласи, тоа ќе биде детерминирано и од развојот на здравствената криза.
„Очекувам дека се добри ефектите од сите мерки што досега ги преземавме и дека ќе дадат уште подобри резултати, со што ќе се создадат услови за да можеме да одиме на парламентари избори, – дали тоа ќе биде јуни, дали ќе биде почетокот на јули, каква и да биде одлука што треба да се донесе врз основа на тие стручни анализи“,
потенцира Спасовски.