Мисијата за Панама, која претседава со Советот за безбедност на ОН од почетокот на месецов, во изјава за руски медиуми изјавила дека иницијативата за одржување на консултациите, кои се затворени за јавноста, била на Русија
Советот за безбедност на Обединетите нации (ОН) закажа консултации во врска со ситуацијата во Босна и Херцеговина откако Централната изборна комисија на БиХ вчера му го одзеде мандатот на претседателот на Република Српска, Милорад Додик.
Според информациите објавени на веб-страницата на Советот за безбедност, консултациите кои ќе бидат затворени за јавноста ќе се одржат во 21:00 часот по централноевропско време.
Мисијата за Панама, која претседава со Советот за безбедност на ОН од почетокот на месецов, во изјава за руски медиуми изјавила дека иницијативата за одржување на консултациите била на Русија.
Централната изборна комисија на БиХ вчера донесе едногласна одлука за одземање на мандатот на претседателот на Република Српска, Милорад Додик. Одлуката следува по потврдувањето на конечната пресуда на Судот на БиХ со која Додик е осуден на една година затвор и забрана за вршење на оваа и други политички функции во земјата во следните шест години поради непочитување на одлуките на високиот претставник во БиХ, Кристијан Шмит.
Додик оцени дека овој потег е неприфатлив и најави дека Народното собрание на Република Српска ќе одлучи за распишување референдум во наредниот период на кој народот ќе се изјасни за неговиот мандат.