Од Советот најавија дека јавноста ќе биде повикана кога таа ќе заврши и ќе следува гласањето за мислењето што треба да го донесе во однос на предлогот
Советот на јавните обвинители одлучи да ја исклучи јавноста од расправата за разгледување на предлогот за разрешување на државниот јавен обвинител Љупчо Коцевски.
По две одложувања, членовите на Советот денеска се собраа да расправаат по предлогот.
Но, веднаш дојде и предлог таа да биде зад затворени врати, поради, како што беше кажано, сензитивноста на ситуацијата и податоците и доказите кои ќе бидат изнесени.
Предлогот седницата да биде затворена го даде членката на Советот, Зорица Павловиќ, која се повика на член 10 од Законот за Совет на јавни обвинители.
„Предлагам да се исклучи јавноста заради заштита на угледот на јавниот обвинител и фактите и доказите изнесени во неговото произнесување по предлогот”,
рече Павловиќ.
Предлогот со идентичен став го поддржа и нејзината колешка, Светлана Стојковиќ, која ги наведе истите аргументи.
„Поради сензитивноста на ситуацијата во која се наоѓаме по трагедијата во Кочани и заштита на угледот и интегритетот на јавниот обвинител, јавноста да биде исклучена. Во одговорот на предлогот јавниот обвинител изнесува податоци, информации и прилози кои се поврзани со дисциплинската постапка која се води спрема двајца јавни обвинители”,
рече Стојковиќ.
Во моментов трае дискусијата за разгледување на предлогот за разрешување на Коцевски.
Од Советот најавија дека јавноста ќе биде повикана кога таа ќе заврши и ќе следува гласањето за мислењето што треба да го донесе во однос на предлогот.
Утре истекува рокот во кој Советот на јавните обвинители треба да даде мислење по предлогот на Владата за разрешување на Коцевски, иако, ако се земе предвид развојот на настаните што се случија во меѓувреме, тоа нема да има влијание на постапката, која Владата реши да ја запре по трагедијата во Кочани во која загинаа 59 лица.
Имено, минатата недела, односно на 25 март, премиерот Христијан Мицкоски рече дека постапката која беше иницирана од Владата во февруари треба да остане во фазата во која се наоѓа во моментов поради истрагата за пожарот во т.н. кабаре во Кочани на која работи тим од 11 обвинители.
Веќе следниот ден, кога случајно или не беше одложена седницата на Советот на јавните обвинители поради немање кворум, владината портпаролка Марија Митева на прес-конференција, соопшти дека Владата ќе ја прекине постапката за разрешување на државниот јавен обвинител Љупчо Коцевски дури и доколку добие мислење од Советот на јавни обвинители во врска со предложеното разрешување. Тоа, како што појасни таа, значи дека дури и да го добие мислењето од Советот на ЈО, Владата нема да го испрати до Собранието на понатамошно одлучување.