МВР поднесе кривична пријава за насилство против полицаецот и советник во кабинетот на министерот за внатрешни работи Наќе Чулев, кој на денот на изборите во Тетово нападна полицаец. Станува збор за Зоран Ѓорѓиевски-Чикаш, а на снимката што ја објави порталот „Локално“ тој му се заканува на началникот на Единицата за безбедност во сообраќајот во Тетово.
„Во врска со несоодветно и насилничко однесување на припадникот на МВР, Одделот за внатрешна контрола криминалистички истраги и професионални стандарди при МВР ги заврши потребните проверки за настанот во Тетово кој се случи на 15.07.2020 год. при што констатира дека постои основано сомнение дека полицискиот службеник, државен советник за полициски и криминалистички работи на министерот за внатрешни работи сторил кривично дело насилство по член 386 став1 и малтретирање при вршење служба по член 143 од КЗ за што против истиот до ОЈО ГОКК – Одделението за гонење на сторители на кривични дела на лица со полициски овластувања поднесена е кривична пријава“,
пишува дополнителната заменик-министерка Славјанка Петровска.
Против државниот советник поведена е и постапка за утврдување на дисциплинска одговорност и тој ќе биде суспендиран од работното место до завршување на дисциплинската постапка во МВР.