СДСМ не го наведува името на советникот чие членство ќе биде прекинато, но соопштија дека тој ќе биде исклучен од партијата поради непочитување на партиските одлуки и ставови, односно бидејќи гласал за избор на претседател на Советот на Општина Карпош
За претседател на Советот на Општина Карпош со мнозинство гласови минатата недела беше избран Христо Саракинов од ВМРО-ДПМНЕ
Опозицискиот СДСМ информира дека Извршниот одбор на партијата донел одлука за отпочнување постапка за исклучување од партиското членство на еден од членовите на Советот на Општина Карпош.
Оттаму не го наведуваат името на советникот чие членство ќе биде прекинато, но соопштија дека тој ќе биде исклучен од СДСМ поради непочитување на одлуките и ставовите на партијата и работење спротивно на нејзините интереси, конкретно, бидејќи гласал за избор на претседател на Советот на Општина Карпош.
„Советникот гласаше за изборот на претседател на Советот во Карпош спротивно на партиските одлуки и ставови. Согласно Статутот на СДСМ, непочитување на одлуките, работење и гласање спротивно на интересите на СДСМ, како и нанесување значителна штета на партијата повлекува одговорност, а тоа се однесува и на сите избрани советници“,
велат од СДСМ.
Од партијата дополнително додаваат дека ќе преземат соодветни мерки за заштита на своите советници во општините на локално ниво од, како што велат, притисоците, уцените и заканите од страна на ВМРО-ДПМНЕ.
Советот на Општина Карпош минатата недела одржа конститутивна седница на која со мнозинство гласови за претседател на Советот беше избран Христо Саракинов. Тој на локалните избори беше носител на советничката листа за Карпош на коалицијата предводена од ВМРО-ДПМНЕ.