Директорот на прилепскиот Центар за социјални работи Зоран Малкоски смета дека вчерашниот случај е и напад на околу 1 200 вработени во сите 30 центри за социјални работи низ државава
Социјални работници од Тетово, Прилеп и Неготино денеска изразија поддршка на нивната колешка, која вчера беше ранета од огнено оружје. Побараа итни мерки за заштита, а нападот врз нив да се третира како напад врз службено лице, да имаат физичко обезбедување, психосоцијална поддршка, подобри услови за работа и построги санкции за насилниците.
„Социјалните работници секојдневно се соочуваат со закани, вербални и физички напади додека ја вршат својата должност за заштита на најранливите категории граѓани. Недостатокот на безбедносни мерки во институциите каде што работиме сериозно го загрозува не само нашето физичко здравје и менталното здравје, туку и квалитетот на услугите што ги обезбедуваме“,
изјави Павлинка Волканоска, социјален работник од Неготино.
Ѓурѓица Новеска, социјален работник од Тетово рече дека на службеник кој решава сензитивни прашања, никој не треба да му врши притисок врз здравјето и работата.
Директорот на прилепскиот Центар за социјални работи Зоран Малкоски смета дека вчерашниот случај е и напад на околу 1 200 вработени во сите 30 центри за социјални работи низ државава.
„Ова е специфична институција каде 90 отсто од населението доаѓа за да се решаваат нивните проблеми. Точно е дека секојдневно добиваме вербални, па и физички закани. Мора нешто да се преземе, но, треба консулстација на ниво на Министерство“,
рече Малкоски.
Посочи дека не биле информирани за бегството на осомничениот од Психијатриската болница во Демир Хисар.
„Во Центарот за социјални работи неколку години се водел предмет за осомничениот во бракоразводна парница. Во почетокот, колешката која е ранета беше дел од тимот, но, подоцна кога кажа дека добивала закани од него, ја отстранивме“,
појасни Малкоски.
Вработена во прилепскиот Центар за социјални работи вчера нешто пред 14 часот, во просториите на Центарот, била ранета од огнено оружје.
Таа веднаш била пренесена во прилепската болница и според првичната информација од директорот на Болницата е во стабилна состојба.