Неможноста на надлежните да ја решат ситуацијата во „Комунална хигиена“ принуди дел од скопските општини самостојно да бараат решение за натрупаниот смет
„Ги преземаме работите во наши раце, Општина Центар започнува да ја чисти општината и да го собира сметот самостојно од утре рано изутрина“, напиша градоначалникот Горан Герасимовски на својот фејсбук-профил
Општина Центар најави дека од утре самостојно започнува со собирање на сметот на нејзината територија, за што обезбедила пет камиони. Истовремено во расчистувањето се вклучи и механизацијата со која располага Општината.
„Рано наутро речиси сите хигиеничари, заедно со цела механизација, излегува на терен. Уште еднаш апелирам Град Скопје итно да ги реши проблемите во јавното претпријатие и да започне со чистење на градот. Граѓаните не смее да бидат жртви на лошото управување во градот, ризикот по здравјето на граѓаните е огромен. Состојбата во Центар е алармантна!“,
објави градоначалникот на Центар, Герасимовски.
Реакцијата следува по неколкудневниот протест на вработените во ЈП „Комунална хигиена“ кои бараат повисоки плати и враќање на работа на отпуштените колеги. Директорката на претпријатието Косана Мазнева доцна синоќа со полициска придружба се сретна со дел од вработените од кои побара да го прекинат протестот и да се вратат на работа. Таа кажа дека состојбата е резултат на политички блокади од поединци за кои поднела кривични пријави.
Најавено е дека разговорите меѓу двете страни ќе продолжат утре. Дотогаш сметот и силната миризба остануваат на улиците на Скопје.