„Ако ваквата ситуација продолжи, тогаш со ребалансот ќе ги менуваме проекциите. Секако на Владата ќе и стојат и други мерки на располагање, но ќе видиме. Ги следиме состојбите, да оставиме, да видиме како ќе се развиваат работите“, вели министерката
Владата на дневна основа ги следи случувањата на Блискиот Исток и нивното потенцијално влијание врз домашната економија. Министерката за финансии, Гордана Димитриеска-Кочоска, денеска изјави дека е прерано за прогнозирање, но нагласи дека државата располага со механизми за реакција доколку тоа стане потребно.
Одговарајќи на новинарски прашања, министерката појасни дека Министерството за финансии не е институцијата која предлага кризна состојба, туку тоа го прават ресорните министерства врз основа на детални анализи.
„Во законите е предвидено во кои услови може да има промени. Соодветно ќе реагираме. Нема песимистичко сценарио, законот е јасен. Има членови што кажуваат кога, во кои услови може да се направат промени. Некои прогнози се дека ова нема да трае долго, ќе видиме“,
изјави Димитриеска-Кочоска.
Министерката посочи дека во моментов цената на нафтата е под 75 долари за барел, но оти не се знае до кога ќе биде така. Таа вели дека доколку ваквата ситуација продолжи Владата е подготвена да направи корекции.
„Не можеме да знаеме колкав ќе биде периодот до завршување на ситуацијата на Блискиот Исток, некои велат ќе трае кратко, некои анализи покажуваат дека подолго ќе трае. Треба да почекаме и да видиме, не би сакала однапред да зборувам. Ако ваквата ситуација продолжи, тогаш со ребалансот ќе ги менуваме проекциите. Секако на Владата ќе и стојат и други мерки на располагање, но ќе видиме. Ги следиме состојбите, да оставиме, да видиме како ќе се развиваат работите“,
објасни Димитриеска-Кочоска.
Според министерката, македонската економија изминатиот период е под силно влијание на случувањата надвор, но тоа е предизвик што стои пред Владата и онака како што и досега, во изминатите 20 месеци, покажавме како се работи на економски план, така и ќе продолжиме, ќе создаваме мерки и политики од интерес на стопанството и граѓаните, истовремено имајќи ја предвид состојбата на меѓународно ниво.
Во врска со актуелните случувања на Блискиот Исток што можат да предизвикаат нарушувања во снабдувањето со нафтени деривати на светско ниво, денеска од Министерството за енергетика, рударство и минерални суровини (МЕРМС) рекоа дека државните нафтени резерви се стабилни и е обезбеден сигурен проток и увоз на деривати од повеќе различни извори и земји.
Оттаму велат дека Агенцијата за задолжителни резерви (МАКОРА) постојано ги следи и одржува државните резерви на нафта и нафтени деривати, обезбедувајќи сигурност во снабдувањето, стабилност на пазарот и подготвеност за навремена реакција во случај на какво било нарушување на увозот или снабдувањето.