„Во 2023 година тој се обратил на осомничената за да изврши корекција на основниот проект, а таа, без да изврши проверки на лице место, незаконски извршила промена на правните лица во основниот проект и со тоа овозможила кабарето да поднесува барања за лиценца“, изјави обвинителот Љупчо Коцевски
Државниот обвинител Љупчо Коцевски денеска на прес-конференција пред Основното јавно обвинителство (ОЈО) Кочани ги изнесе првичните детали околу отворената истрага против 27 физички и три правни лица во врска со пожарот во дискотеката „Пулс“ во Кочани во која загинаа 59 лица, а 197 се повредени.
Сите осомничени, како што рече, во периодот од 2012 година до 16 март 2025 година заеднички, но секој од аспект на своите надлежности, воопшто не постапиле според прописите и мерките за заштита, на тој начин предизвикувајќи тешки дела против општата сигурност. До пожарот со смртни последици, како што додаде, довеле верижните пропусти и незаконити дејствија на одговорните и службените лица.
Во своето излагање пред медиумите, Коцевски практично ги групираше осомничените според своите надлежности и според дејствата кои (не) ги преземале, а довеле до трагичниот настан на 16 март годинава.
Тројца од вкупно 27-те осомничени физички лица се јавуваат како одговорни лица, косопственици или управители во извесен период во правното лице, чија подружница е кабаре-клубот „Пулс“.
„Првиот од нив е закупец на објектот каде е лоциран клубот, реален сопственик и носител на целокупниот деловен потфат и работењето. Објектот со намена за лесна индустрија кој се наоѓал во индустриска зона воопшто не исполнувал услови да биде пренаменет во угостителски објект – кабаре согласно Законот за угостителска дејност, но во континуитет во целиот период осомничените добивале лиценца незаконито и организирале угостителски услуги. Притоа сите знаеле и биле свесни дека клубот не ги исполнува законски пропишаните услови и начин за вршење на угостителска дејност“,
изјави обвинителот.
За првоосомничениот, односно закупецот на објектот, како што рече Коцевски, постои сомнение дека во периодот од 13 февруари 2024 до 13 февруари 2025 година со одредена сума на пари го поткупил осомничениот вработен во Министерството за економија за да му биде издадена фалсификувана лиценца за вршење угостителска дејност.
„Поради тоа, против вработениот во Министерството за економија е поведена постапка и за примање поткуп“,
вели Коцевски.
Како една од осомничените во случајот се јавува и сопственичката и управителка на една од трите осомничени фирми. Таа, како што појасни обвинителот, на барање на осомничениот сопственик, во 2010 година му изготвила основен проект, кој бил услов за отпочнување со работа на кабаре-клубот, и покрај тоа што знаела дека не постојат законски услови за пренамена на објектот од категорија лесна индустрија во угостителски објект.
Единаесет години по ред – од 2012 до 2023 година – сопственикот го користел незаконски изработениот проект во прилог на барањата кои ги доставувал за добивање лиценци за вршење на угостителска дејност во кабарето.
„Во 2023 година тој се обратил на осомничената за да изврши корекција на основниот проект, а таа, без да изврши проверки на лице место, незаконски извршила промена на правните лица во основниот проект и со тоа овозможила кабарето да поднесува барања за лиценца“,
додаде обвинителот.