Бараме да се утврди вистината, каде се случиле пропустите, кој не реагирал, кои институции задоцнија, кој ја имал должноста да спречи, а не спречил, порача Наталија Ѓорѓиеска, сопруга на пејачот Андреј Ѓорѓиески од ДНК и побара пратениците да иницираат надзорна расправа и посебна Анкетна комисија за трагедијата во „Пулс“
Наталија Ѓорѓиеска, сопругата на пејачот Андреј Ѓорѓиески од ДНК, кој загина во пожарот во т.н. кабаре „Пулс“, денеска во обраќање пред Собранието ги повика пратениците да помогнат во потрагата по вистината за трагедијата.
Таа во име на семејствата на загинатите побара пратениците да иницираат надзорна расправа и посебна анкетна комисија за, како што рече, целосно и независно испитување на случајот.
„Бараме да се утврди зошто институциите задоцнија. Никој не треба да живее во мислата дека некој можел да биде спасен, а не бил. Никое семејство не треба да носи болка која е последица на ваков пропуст, негрижа или недејствување. Бараме да се утврди вистината, каде се случиле пропустите, кој не реагирал, кои институции задоцнија, кој ја имал должноста да спречи, а не спречил. Бараме посебна анкетна комисија, затоа што имаме право сите на вистина. Истражувањето што се водеше остана нецелосно, со многу отворени прашања, без одговор и недоразјаснети околности. Ние, семејствата, останавме со сомнеж дека вистината овојпат е сокриена“,
кажа Ѓорѓиеска во говорот пред закондавниот дом.
За неа, трагедијата во Кочани претставува сериозна навреда на најосновните човекови права – право на живот, на безбедност и право на навремено и ефективно постапување на институциите во ситуација со закана по живот.
Таа вели дека Анкетната комисија е неопходна за проверка на постапувањето на сите институции од локално до централно ниво, да се утврди евентуална политичка или службена одговорност и да се подготват мерки кои ќе гарантираат дека ваква трагедија никогаш веќе никому нема да се случи.
„Ние не бараме сочувство, тоа за жал не ги враќа нашите најмили и не може да ни ја избрише болката. Бараме институционална вистина, фер постапка и гаранција дека ниту едно семејство нема да се разбуди во ноќта којашто ние ја преживеавме. Ваша должност е да ја заштитите јавноста и сите граѓани“,
им порача Ѓорѓиеска на пратениците.
Таа посочи дека на денешниот марш зборуваат како луѓе, семејства и родители, кои сфатиле дека трагедијата што се случи во Кочани може да му се случи на кој било и дека никој не е заштитен кога институциите не ја вршат својата работа.
„Маршот за ангелите“ во Скопје започна во 12:05 од плоштадот „Македонија“.
По говорите пред Собранието, маршот продолжи кон Основниот кривичен суд Скопје, каде исто така се предвидени обраќања.
Учесниците скандираат „Правда за Кочани“, a напред е истакнат голем транспарент со фотографии од жртвите во „Пулс“ и натпис „63 сенки ќе ве следат – секој поглед бара правда“.
Маршот се одржува на четири дена пред почетокот на судењето за случајот.