Министерот за внатрешни работи рече и оти сите проблеми или неправилности со работењето на системот ќе може да се пријават преку посебен пункт на МВР
Тест-периодот на проектот „Безбеден град“ дава охрабрувачки резултати, возачите забележително ја намалија брзината на движење, а бројот на сообраќајни незгоди бележи пад, рече министерот за внатрешни работи Панче Тошковски. Тој рече и оти е горд што македонските граѓани и во тест период кога ќе се вметне едно решение, покажале дека се вистински Европјани.
„Се намалуваат сообраќајните незгоди на територијата на Град Скопје, а особено бројот на незгоди со тешки телесни повреди и смртни последици“,
рече Тошковски.
Министерот нагласи дека почитувањето на ограничувањата на брзината е еден од клучните фактори за спречување на тешките последици во сообраќајот, потсетувајќи дека и меѓународните статистики укажуваат на директна поврзаност меѓу брзината и степенот на повреди при сообраќајни незгоди.
„Ако ја земеме глобалната статистика, при возење со 60 километри на час скоро и да нема преживеано лице, односно од десет повредени лица при сообраќајка сите починале, сторување кривично дело при возење од 50 километри на час од десет поврдени преживеале само двајца и со брзина на возење од 30 километри на час од 10, преживеале осум луѓе“,
рече тој.
Во врска со забелешките од граѓаните, Тошковски изјави дека сите проблеми и евентуални неправилности поврзани со функционирањето на системот „Безбеден град“, кој е во тест-фаза до први февруари, ќе можат да се пријавуваат преку посебен пункт во управните служби на МВР, како и преку интернет-платформа што ќе биде дополнително воспоставена. Во подготовка е и мобилна апликација преку која граѓаните ќе можат да пријавуваат нелогичности и технички пропусти.