Во вооружениот инцидент учествувале татко и неговиот 18-годишен син, од една, и едно малолетно лице, од друга страна. Сите тројца се повредени, од кои таткото и малолетникот потешко
Основното јавно обвинителство Скопје поведе постапка во врска со инциднетот што вчеравечер се случи во скопски Чаир, во кој три лица беа повредени по меѓусебната пресметка со нож.
Во инцидентот, како што соопштија попладнево од Јавното обвинителство, учестувале татко и син, од една, и едно малолетно лице, од друга страна. Повод за вооружениот инцидент, на кој му претходела вербална расправија, биле недоразбирања во сообраќајот.
Според Обвинителството, постапка е поведена против едно лице на возраст од 18 години кое е осомничено за кривичното дело тешка телесна повреда, како и против неговиот татко, додека малолетникот ќе се гони согласно Законот за правда на децата.
„Од доказите обезбедени во предметот постои основано сомнение дека повод за оружениот инцидент со нож била меѓусебна вербална расправија во сообраќај, меѓу осомничениот и неговиот татко од една страна и малолетникот од друга страна. Расправијата прераснала во физичка пресметка, во која таткото и синот со употреба на физичка сила, клоци и тупаници го нападнале малолетното дете. Во тој момент детето извадило нож со кој им нанело повеќе убодни рани по телото на осомничениот и неговиот татко. Осомничениот успеал да му го земе ножот на детето и го прободел во градниот кош“,
се наведува во соопштението на Јавното обвинителство.
Сите три лица инволвирани во пресметката се повредени.
Таткото на осомничениот и малолетникот се хоспитализирани со тешки телесни повреди, додека кај 18-годишникот биле констатирани полесни повреди.
За него јавниот обвинител веќе побарал судот да му определи мерки на претпазливост, односно забрана за напуштање на живеалиштето, обврска да се јавува повремено на определено службено лице во Основниот кривичен суд Скопје, привремено одземање на пасошот и забрана за одржување контакти со малолетното дете кое го повредил.