Синдикатот бара усогласување на платите во образованието и во детската заштита и дополнително минималната плата да биде основица со која ќе се множат коефицинетите на сложеност на работни места
Претставници на Самостојниот синдикат за образование, наука и култура (СОНК)попладнево се на преговори во Владата, во обид за договор за исполнување на нивното барање за зголемување на платите, односно усогласување на платите во дејностите образование и детска заштита со покачената минимална плата.
Претседателот на СОНК, Јаким Неделков, објави на фејсбук дека преговорите се од 15 часот, на покана на премиерот Димитар Ковачевски.
Членството од регионите на Синдикатот се изјасни за генерален штрајк, кој би почнал на 11 април, доколку не се исполнат нивните барања. СОНК бара усогласување на платите во образованието со миниманата плата, која од овој месец се зголемува од 15 200 на 18 000 денари и дополнително минималната плата да биде основица со која ќе се множат коефицинетите на сложеност на работни места.
СОНК бара корекции на платите и за вработените во градинките, како и усогласување со минималната плата во високото образование и за вработените во ученичките и студентските домови.
Конфедерацијата на слободни синдикати на Македонија (КСС) соопшти за време на викендот дека добила поддршка од СОНК, кој, како што се наведува, брои околу 30 000 члена, за предупредувачкиот протест најавен за 30 март (утре), како и за активностите што ги преземаат дел од гранските синдикати здружени во КСС за подобрување на работничките права.
Вицепремиерот Фатмир Битиќи, вчера на ТВ-дебата со синдикални претставници, меѓу кои и Неделков, изрази жалење што за само три недели, откако почна руско-украинскиот конфликт, не важи она околу кое сите страни се согласиле на 23 февруари и веќе се најавуваат штрајкови. Според него, тоа е непочитување на основните принципи на дијалог.
„За три недели, покрај се што се договоривме, одеднаш не доведе во ситуација да се соочиме со најави за штрајкување и за нас тоа е навистина зачудувачки, зашто само пред 1,5 месец се договоривме дека влегуваме во процесот. Донесовме и одлука дека дијалогот продолжува, но, за жал, беше најавено дека на 30 ќе има протест, а се договоривме дека дијалогот ќе продолжи во секое министерство и никој не рече дека не сака да преговара“,
истакна Битиќи.