Европа внимателно го следи Зеленски, кој претходно вчера се сретна со канадскиот премиер Марк Карни во Халифакс
Украинскиот претседател Володомир Зеленски ноќеска одржа видео средба со речиси десетици европски земји и Канада, како и високи претставници од Европската комисија и НАТО, пред неговата денешна средба со американскиот претседател Доналд Трамп во Флорида, јави ДПА.
Портпарол на германската влада изјави дека лидерите му дале на Зеленски целосна поддршка и ја нагласиле својата посветеност на тесна соработка со САД за постигнување одржлив и праведен мир во Украина.
Германскиот канцелар Фридрих Мерц ја свикал телефонската конференција на барање на Зеленски, изјави портпаролот, пренесе германската агенција.
Официјални лица во Елисејската палата изјавија дека францускиот претседател Емануел Макрон на средбата изјавил дека Европејците мора целосно да бидат вклучени во дискусиите што ги засегаат.
Макрон треба да биде домаќин на уште еден состанок на „Коалицијата на подготвените“ – група земји кои ветија силна поддршка за Киев во Париз во јануари.
Претседателката на Европската комисија, Урсула фон дер Лајен, која исто така учествуваше во повикот, на социјалната мрежа Икс напиша дека сите напори водат кон „нашата заедничка цел – праведен и траен мир што ќе го зачува суверенитетот и територијалниот интегритет на Украина“, пренесува ДПА.
Европа внимателно го следи Зеленски, кој претходно вчера се сретна со канадскиот премиер Марк Карни во Халифакс.
Белата куќа доцна синоќа соопшти дека билатералната средба во Мар-а-Лаго ќе се одржи во 13 часот (18:00 часот по Гринич), два часа порано од првично планираното. Не беше наведена причина за промената на времето.
Зеленски вчера соопшти дека за време на разговорите ќе стави до знаење дека Киев нема да прифати капитулација или диктиран мир со Москва.
„Секако, постојат црвени линии за Украина и украинскиот народ“,
рече тој во изјава објавена на социјалните медиуми пред состанокот.
Тој постојано ги отфрла барањата на Русија, исто така покренати од Трамп, Украина да отстапи територија што моментално не е под руска контрола, иако рече дека Киев изнел компромисни предлози за нерешените територијални прашања.
Тој рече дека планира да разговара со Трамп за рамката од 20 точки за можен мировен план што го презентираше претходно оваа недела, додавајќи дека безбедносните гаранции ќе бидат централни за каков било прекин на огнот за заштита на Украина од обновени руски напади.