По барање на координаторката на „Европски фронт“, Рина Ајдари, гласањето беше спроведено и номинално, односно секој пратеник гласаше поединечно
Со 81 глас „за“, 19 „против“ и без воздржани денеска Собранието го изгласа предлог-закон за изменување и дополнување на Законот за прекршоци, по скратена постапка. При гласањето беа присутни 100 пратеници, а 20 беа отсутни.
Со ова, се отвора патот за официјален старт на системот за автоматско снимање и санкционирање на сообраќајни прекршоци „Безбеден град“, кој треба да почне да функционира од 1 февруари.
За усвојување на овој предлог-закон беше потребно двотретинско мнозинство, што го овозможи пратеничката група на Левица.
Предлог-законот за прекршоци го поддржаа пратениците на ВМРО-ДПМНЕ, ВЛЕН, ЗНАМ, Левица и дел од пратениците на Демократската унија за интеграција, односно „Европски фронт“.
Против гласаа сите присутни пратеници од Социјалдемократскиот сојуз (СДСМ), како и дел од пратениците на „Европски фронт“, меѓу кои Блерим Беџети, Арбана Пашоли, Садик Сулејмани, Талат Џафери и Ријад Шакири.
По барање на координаторката на „Европски фронт“, Рина Ајдари, гласањето беше спроведено и номинално, односно секој пратеник гласаше поединечно.
Пред почетокот на гласањето, пратеникот од Левица, Борислав Крмов, го соопшти ставот на партијата, односно дека ќе го поддржат предлог-законот за прекршоци, зашто сметаат дека со него ќе се спасуваат човечки животи.
„Секако дека законот не е совршен, има многу работи што ќе треба да се менуваат. Очекуваме тие да се менуваат во од, како што ќе тече неговата примена. Планираме да се вклучиме во тој процес, особено во делот околу казнувањето. Сметаме дека треба да има скалесто казнување, односно секој да плаќа според своите примања. Тоа ќе биде едно од нашите главни барања“,
кажа тој.
Координаторите на двете Алијанси за Албанците, и таа на Арбен Таравари и на Зијадин Села, како и „Европскиот фронт“ и Социјалдемократскиот сојуз (СДСМ) се изјаснија дека ќе гласаат против овој предлог-закон.
Координаторот на пратеничката група на СДСМ, Оливер Спасовски, пред гласањето рече дека тие се против ваквиот предлог-закон оти се загрижени за безбедноста на податоците, односно дека не се знае како ќе се чуваат и каде ќе завршат податоците од овој систем, особено што, како што рече, актуелната власт предводена од ВМРО-ДПМНЕ има лоша историја со злоупотреба на личните податоци на граѓаните.
„Многу посеопфатно требаше да се пристапи кон целиот овој концептот на ‘Сејф сити‘. Требаше најмалку шест месеци да имаме пробен период за да отстранат сите недостатоци“,
кажа тој.
Главни забелешки на опозицијата се дека пораките за прекршоци не се испраќаат и на албански јазик, дека законот е дискриминирачки бидејќи ќе се казнуваат само возачите во Скопје, Тетово и Куманово, како и дека законското решение не предвидува контрола на податоците на граѓаните од електронската пошта и телефонските броеви, како и на снимките.
Од 1 февруари казни за четири прекршоци
Со измените во законот се предвидува зајакнување на безбедноста во сообраќајот преку воведување посебна постапка за прекршоци со помош на технички средства и евиденциски канцеларии. Се очекува брзото и ефикасно санкционирање на прекршоците и изрекувањето санкции да влијае на општата превенција во областа на безбедноста во сообраќајот.
Во првата фаза системот ќе регистрира прекршоци, како пречекорување на дозволената брзина, поминување на црвено светло, истечена важност на сообраќајна дозвола и непрописно запирање и паркирање.
Во следна фаза се предвидува проширување на спектарот на прекршоци.
Кога системот ќе биде целосно ставен во употреба, сопствениците на возила за кои е утврден прекршок ќе добијат СМС-порака и е-пошта со линк за преземање извештај со платен налог. Прекршоците може да се платат електронски, а нема да се наплаќаат дополнителни трошоци за навремено плаќање. За одредени прекршоци за кои е пропишана забрана за управување со возило МВР ќе поднесе барање за постапување до надлежниот суд.