Координаторот на пратеничката група на ВМРО-ДПМНЕ. Никола Мицевски, во образложението истакна дека парламентарното мнозинство и Владата имаат јасна, доследна и непроменлива политика против нелегалната миграција. Тој нагласи дека Владата никогаш не побарала, не договорила и нема да дозволи изградба на мигрантски кампови или трајно сместување мигранти на територијата на општините во државата
Собранието со 65 гласа „за“ и пет гласа „против“ попладнево ја донесе „Резолуцијата за осуда на манипулациите на опозицијата и за потврда на политиките против нелегалната миграција“ поднесена од пратеничката група на ВМРО-ДПМНЕ.
Координаторот на пратеничката група на ВМРО-ДПМНЕ, Никола Мицевски, во образложението истакна дека парламентарното мнозинство и Владата имаат јасна, доследна и непроменлива политика против нелегалната миграција. Тој нагласи дека Владата никогаш не побарала, не договорила и нема да дозволи изградба на мигрантски кампови или трајно сместување мигранти на територијата на општините во државата. Со оваа Резолуција, како што посочи Мицевски, се става крај на сите шпекулации и намерно пласирани невистини.
„Република Македонија се наоѓа во состојба на десет дена континуирана дезинформација по одредени теми и од таа причина, една од мерките која што ние како одговорно владејачко мнозинство имаме да го преземеме е да им укажеме на граѓаните дека со она што го тврди дел од опозицијата преку лажни тврдења за наводно прифаќање на мигранти и изградба на мигрантски кампови, се настојуваше да се урне довербата во институциите и да се злоупотреби чувството на безбедност на граѓаните за дневнополитички цели. Овие лажни сценарија немаат никаква основа во реалноста и не соодејствуваат ниту со политиките на парламентарното мнозинство, а со тоа ниту на владините политики. Напротив, парламентарното мнозинство и власта имаат јасна и доследна и непроменета политика против нелегалната миграција. Владата никогаш не побарала, не договорила и нема да дозволи изградба на мигрантски кампови или трајно сместување на мигранти на територијата на општините, бидејќи се има обид да се симне оваа тема на општинско ниво и нема да дозволи да се случува никаде во државата“,
изјави Мицевски.
Пратеничката Јована Мојсовска од Левица рече дека единствен аргумент за оваа лошо склопена резолуција е дека премиерот Мицкоски ветил.
„Ако за вас секој збор што премиерот Мицкоски ќе го каже е релевантен, тоа апсолутно не важи за нас и ние го имаме целосниот легитимитет, да имаме и тоа како скепса и дилема за она што го ветува премиерот. Јас апсолутно се сомневам во изјавите на премиерот, не затоа што доаѓам од опозицијата, туку затоа што тоа го покажува емпиријата… апсолутно имаме целосен легитимитет да не веруваме во неговите најави дека ќе понесе политичка одговорност доколку се покажат спротивни тврдења за мигранти, затоа што во изминатата година и половина не видовме никаква политичка одговорност за се што говоревте во опозиција, а сега ревносно го продолжувате“,
изјави Мојсовска.
Пратеникот и координатор на пратеничката група на ВЛЕН, Беким Ќоку, рече дека резолуцијата има превентивна улога која испраќа порака дека прашањата за безбедност, миграцијата и јавниот ред не смеат да се манипулираат за политички придобивки.
„Оваа резолуција не ѝ се обраќа на опозицијата во целина, туку на опозицијата која се труди на секој недозволив начин да придобие политички поени на грбот на граѓаните и да создаде политичка нестабилност. Оваа резолуција е најсериозниот и најостриот одговор како демократско средство“,
изјави Ќоку.
Пратеничката и координатор на пратеничката група на ДУИ, Рина Ајдари, рече дека предлог-резолуцијата на власта е атипична и штетна за парламентарната демократија и нагласи дека со оваа резолуција се создава опасен преседан и се поларизира општеството.
„Оваа резолуција е еден сериозен обид, како што изгледа, за да има повеќе авторитаризам и еден систем што е еднопартиски. Јас не знам како може да се изземе правото на говор на опозицијата, бидејќи во демократија одговорноста е индивидуална и има име. Ова е сериозна закана за демократијата и непочитување на човековите права. Ние сме против дезинформациите, но ова дефинитивно не е начинот за да се бориме против ова“,
изјави Ајдари.
Членовите на собраниската Комисијата за политички систем и односи меѓу заедниците претходно денеска на седница дадоа поддршка за „Резолуцијата за осуда на манипулациите на опозицијата и за потврда на политиките против нелегалната миграција“, поднесена од пратениците од ВМРО-ДПМНЕ.