СДСМ и ДУИ се изјаснија дека го поддржуваат документот, но дека нема да го гласаат ако во неа не е вметнато уставното име на државата. Пратениците денеска ќе расправаат и за ребалансот на Буџетот
Резолуцијата на ВМРО-ДПМНЕ за евроинтеграцискиот пат на земјата и националните црвени линии е на дневниот ред на 47. седница на Собранието, која треба да се одржи денеска. Претседателот на ВМРО-ДПМНЕ, Христијан Мицкоски синоќа од скопски Карпош побара резолуцијата да биде прифатена од сите политички партии „без условувања и барање на изговори“. Мицкоски истакна дека нејзиното прифаќањето од сите политички партии ќе значи единство кое ни е потребно за почеток на преговорите со Европската Унија, но, пред се ќе се зацврстат државните позиции на Македонија.
Министерот за надворешни работи Бујар Османи, вчера изјави дека ДУИ ќе ја поддржи резолуцијата за црвените линии во преговорите со Бугарија, доколку се користи уставното име на државата. Според него, резолуција во која нема уставно име, нема правна форма.
Ставот на Османи е вусшност позицијата која претходно ја соопшти премиерот Зоран Заев кој најави дека пратениците од СДСМ нема да гласаат за резолуцијата, доколку таа остане со името како што е сега поднесена. Притоа, информираше дека разговарале со опозициската ВМРО-ДПМНЕ за да се изнајде решение, при што било заклучено дека процесот треба да продолжи, но, притоа мора на дневен ред да продолжи дискусијата согласно Уставот и Законот.
Продолжува дебатата и за ребалансот на Буџетот
Пратениците денеска треба во второ читање да ги разгледаат и предлог законските решенија од повеќе закони, помеѓу кои и Предлог за изменување и дополнување на Буџетот на Република Северна Македонија за 2021 година, Предлог на закон за изменување и дополнување на Законот за постапување со бесправно изградени објекти, Предлог на закон за изменување и дополнување на Законот за јавните набавки во областа на одбраната и безбедноста, Предлог на закон за управување со батерии и акумулатори и отпадни батерии и акумулатори и Предлог на закон за управување со електрична и електронска опрема и отпадна електрична и електронска опрема.
По скратена постапка на дневниот ред се и Предлог на закон за отпис на камати и репрограмирање на долгови и трошоци на физички лица во услови на КОВИД-19, Предлог на закон за изменување и дополнување на Законот за државјанството на Република Македонија, Предлог на закон за материјално обезбедување на невработените лица поради приватизацијата на претпријатијата со доминантна сопственост на државата, Предлог на закон за изменување и дополнување на Законот за концесиии и јавно приватно партнерство, Предлог на закон за изменување на Законот за домување, Предлог на закон за финансиска поддршка за намалување на последиците предизвикани од Ковид-19 врз производството и откуп на тутун, Предлог на закон за изменување на Законот за животната средина, Предлог на закон за изменување и дополнување на Законот за рамномерен регионален развој и Предлог на закон за изменување и дополнување на Законот за Собранието на Република Македонија,
На дневниот ред е и Предлог за именување член на Регулаторната комисија за домување како и првото читање на Предлог на закон за изменување и дополнување на Законот за трговија, Предлог на закон за изменување и дополнување на Законот за работните односи, Предлог на закон за изменување и дополнување на Законот за основање на Државна комисија за одлучување во управна постапка и постапка од работен однос во втор степен и Предлог на закон за продажба на станови во државна сопственост доделени на користење на вработени во Министерството за внатрешни работи и безбедносно разузнавачки служби.
Од денешната седница е повлечен материјалот за Предлог на закон за изменување и дополнување на Законот за финансиска поддршка на инвестиции.
На денешниот дневен ред, пратениците ќе расправаат и за неколку барања за автентично толкување, помеѓу кои се: Барање за давање на автентично толкување на член 3 точка 8, член 19 и член 20 од Законот за приватните агенции за вработување, а во врска со членот 112 став (5) од Законот за работните односи, Барање за давање на автентично толкување на членот 44 став 1 од Законот за вработените во јавниот сектор и Барање за давање на автентично толкување на член 19 став 1 точка 4 во врска со Член 18 став 1 и член 83 став 1 од Закон за пензиско и инвалидско осигурување.