Вицепремиерот за борба против корупцијата Љупчо Николовски преку социјалните мрежи информираше дека на владина седница поминале предлог-измените на Законот за заштита на населението од заразни болести.
Со нив, инспекторите добиваат нови поголеми овластувања за да можат на терен да се справат со оние кои ги кршат ковид-протоколите.
„Законските измени се однесуваат на Државниот пазарен инспекторат, Државниот инспекторат за труд, Државниот испекторат за транспорт и за другите инспекторати на централно и локално ниво. Според измените, доколку инспекторите утврдат прекршување на здравствените протоколи, ќе имаат овластување на лице место да изречат привремена забрана за вршење на дејноста во траење до 30 дена на правните субјекти“,
соопшти Николовски.
Паралелно, со законските измени ќе се зголемат и казните за прекршување на здравствените протоколи и висината на глобата ќе се одредува во зависност од големината на фирмата.
За да стапат на сила, законските измени сега ќе треба да се усвојат и во Собрание.
