Епидемиолошката слика на Исланд е најдобриот доказ за тоа колку се ефикасни вакцините. Оваа мала островска земја истовремено бележи рекорден број заразени и екстремно мал број хоспитализирани лица, а најдобрата вест е дека нема смртни случаи од 25 мај. Ова, како што велат научниците, е резултат вакцинацијата
Исланд пријави 2 847 нови случаи на инфекција со коронавирусот во изминатите 30 дена, што е најголем број во еден месец од почетокот на пандемијата во земјата. Според експертите, виновникот е позаразниот делта-сојот на коронавирусот. Сепак, две работи радуваат – симптомите на голем број нови инфекции се благи, а бројот на смртни случаи е нула.
Научниците веруваат дека клучот е имунизацијата. Исланд е на четвртото место според стапката на вакцинација – 70,6 проценти од граѓаните ги примиле двете дози. Само Сингапур (73,1 проценти), Обединетите Арапски Емирати (73,7 проценти) и Малта (80,5 проценти) се пред Исланд. Соединетите Држави вакцинираа само 50,7 проценти од населението со двете дози. На глобално ниво, просекот е уште полош – само 23,6 проценти.
Брендон Гатри, епидемиолог и професор на Универзитетот во Вашингтон, изјави за „Вашингтон пост“ дека фактот дека имало малку смртни случаи за време на големото зголемување на инфекциите во Исланд треба да се смета за барем делумна победа. Карлос дел Рио, професор по медицина на Медицинскиот факултет Емори, објави на Твитер во неделата: „Исланд е доказ дека вакцините функционираат“.
Повеќето Исланѓани ја примија вакцината „Фајзер“, иако земјата увезе вакцини и од производителите „Модерна“, „Астра Зенека“ и „Џонсон и Џонсон“. Повеќе од 98,2 проценти од луѓето постари од 90 години биле вакцинирани со двете дози, во споредба со „само“ 70,8 проценти од луѓето во возрасната група од 16 до 29 години.
И покрај успешната стапка на вакцинација, исландските здравствени власти велат дека ќе одржат превентивни ограничувања барем до крајот на август. Овие ограничувања се однесуваат на бројот на луѓе што можат да се соберат на едно место (до 200 луѓе), социјалната дистанца од најмалку еден метар е исто така задолжителна, маски за лице мора да се носат во затворени простории и полициски час кој започнува во 23 часот.
Минатиот четвртокот земјата започна да им дава дополнителна доза на оние што примиле една доза од вакцината „Џонсон и Џонсон“, како и на оние што имаат слаб имунолошки систем.
Според официјалните податоци, од почетокот на пандемијата, оваа островска држава, која има само 350 000 жители, има регистрирано 9 522 случаи на инфекција и 30 смртни случаи.