Целта е да креираме буџет што ќе може да ја поддржи македонската економија за да биде подготвена да се врати во полна активност во моментот кога ќе имаме услови за тоа, вели премиерот Спасовски
Со ребалансот на буџетот што го подготвува владата, заради санирање на економските последици од здравствената криза, нема да се кратат средства за капитални инвестиции, а засега нема ниту одлука за намалување на платите во администрацијата, најавува премиерот Оливер Спасовски.
Со престојниот ребаланс ќе креираме буџет што ќе може да ја поддржи македонската економија за да биде подготвена да се врати во полна активност во моментот кога ќе имаме услови за тоа и нема да се кратат капиталните инвестиции,
изјави Спасовски.
За ребалансот, како што рече, се дискутирало неколкупати во рамки на економскиот тим на Владата и на Економскиот совет, а ќе се разговара и во наредните денови.
„Наша идеја е да направиме кратење што ќе биде во насока на функционирање на државата. Тука сметам пред се дека треба да останат максимално капиталните инвестиции, оние што создаваат добра економска активност, за да можеме да ги одработиме сите тие проекти. На тоа сме насочени како Влада“,
рече Сапсовски.
Прашан дали со ребалансот ќе има кратење на платите во админстрацијата, премиерот посочи дека засега нема таква одлука.
„Ги гледаме сите анализи што стојат пред нас и засега нема таква одлука. Знаете дека донесовме одлука за намалување на платите на функционерите и тоа беше една од најисправните одлуки токму ние кои имаме најголеми плати во државата да ги намалиме на минимална плата. И покрај одлуката на Уставниот суд платите да останат исти сите функционери веќе ги донираат своите плати во Фондот за солидарност што го формиравме за справување со ковид-19“,
нагласи Спасовски.