Во соопштението од Министерството за култура се наведува оти гостите и посетителите кои ја проследиле борбената и емотивна приказна на Атиџе Муратова од документарецот „Медена земја“ биле топло пречекани и со специјалитети од македонската кујна
Претходно, македонската државно-црковна делегација оддаде почит пред гробот на Свети Кирил во базиликата „Сан Клементе“, каде митрополитите г. Пимен и г. Јосиф одржаа молебен во чест на Св. Кирил
Во рамки на вториот ден од посетата на Рим и Ватикан по повод 24 Мај, министерката за култура Бисера Костадиновска-Стојчевска и членовите на државно-црковната делегација предводена од премиерот Димитар Ковачевски во киното „Тицијани“ присуствуваа на проекција на документарниот филм „Медена земја“ на режисерката Тамара Котевска, со што беше заокружен културно-уметничкиот дел и програмата по повод традиционалното чествување на светите браќа Кирил и Методиј во Рим.
Како што се наведува во соопштението од Министерството за култура, присутните ги поздравија амбасадорот на РСМ во Италија, Весел Мемеди и Лавинија Де Николо, претседателка на Асоцијацијата „Жени дипломати“ при МНР на Италија АЦДМАЕ, воедно и иницијатори на настанот.
На настанот, амбасадорот на Република Северна Македонија во Италија, Весел Мемеди изрази задоволство за можноста токму на 24 Мај – Денот на Светите Кирил и Методиј, македонската култура е презентирана пред италијанската јавност.
„Големо е задоволството што токму денеска, на 24 Мај, Светите Кирил и Методиј, заедно со Мајка Тереза, придонесоа преку проекцијата на ‘Медена земја’, нашата земја и култура да бидат препознатливи не само во Италија туку и во светот. Се надевам дека медот ќе биде доволно сладок, за да ја натера италијанската јавност да ја посети нашата медна земја“,
рече амбасадорот Мемеди.
Претседателката на Асоцијацијата „Жени дипломати“, пак, Лавинија Де Николо, истакна дека станува збор за одличен филм и додаде дека најважниот дел е грижата за нашата околина, нешто што долго време се запоставува.
Во соопштението од Министерството за култура се наведува оти гостите и посетителите кои ја проследиле борбената и емотивна приказна на Атиџе Муратова биле топло пречекани и со специјалитети од македонската кујна.
Претходно македонската државно-црковна делегација оддаде почит пред гробот на Свети Кирил во базиликата „Сан Клементе“, каде митрополитите г. Пимен и г. Јосиф одржаа молебен во чест на Св. Кирил.
