Со проблемот ќе се соочиме како возрасни, а не детски: Димитров за последните случувања во односите со Бугарија

Во последните години имаше наредок во односите со Бугарија, но последните чекори го доведуваат тоа во прашање, вели вицепремиерот за европски прашања

Немаме од што да бегаме. Ќе се соочиме со проблемот „возрасно“, не детски, не со Калимеро-логика – нема правда, изјави вицепремиерот за европски прашања Никола Димитров, вечерва во гостување во вестите на Сител, откако дискусија за проширувањето на ЕУ кон Западен Балкан е отстранета од дневниот ред на утрешниот министерски состанок.

МИА: ЕУ е фрустрирана поради бугарската блокада, дискусијата за проширување е отстранета од утрешниот министерски состанок

Димитров рече дека енергијата сега треба да се насочи на внатрешни реформи и на создавање мрежа на пријатели.

„Во последните години имаше наредок во односите со Бугарија, но последните чекори го доведуваат тоа во прашање. Сепак, не сум убеден дека да го немавме Договорот за добрососедство сега ќе бевме во подобра ситуација. Ова е пораз на европската политика кон Балканот“,

изјави, меѓу другото, вицепремиерот.

Бугарскиот европратеник Ковачев: Малку е веројатно дека до утре ќе ја промениме нашата позиција

Во врска со проблемот што искрсна во однос на употребата на придавката „македонски“, Димитров рече дека мешовитата историска комисија нема мандат да отвора такви теми.

„Историчарите немаат мандат да разговараат за овие прашања. Нивниот мандат е утврден со Договорот за добрососедство и пријателство. Многу прашања во изминатиот период излегуваат од рамката на Договорот, чија идеја беше историјата да им се препушти на историчарите, а политиката да се занимава со сегашноста и со иднината“,

рече Димитров.

Мешовитата комисија закочи на употребата на придавката „македонски“: Македонските експерти не ги потпишуваат записниците без тоа