По цело претпладне исполнето со прес-конференции, Собранието попладнево ги изгласа антикризните закони кои беа на дневен ред на 36-та седница
Претходно со двајца пратеници со ковид кои беа сместени во посебни кабини, беа изгласани и триесетина закони кои беа дел од 32-та седница, за кој опозицијата не сакаше да направи кворум
Собранието за половина час ги изгласа трите закони кои се од петтиот пакет економски мерки за справување со последиците од ковид-кризата.
Едногласно со 113, односно 115 гласа „за“ поминаа Законот за финансиска поддршка на физички лица кои вршат самостојна дејност погодени од здравствено-економската криза предизвикана од вирусот COVID-19, за месеците февруари и март 2021 година, Законот за финансиска поддршка на работодавачите погодени од здраствено-економската криза предизвикана од вирусот COVID-19, заради исплата на платите за месеците февруари и март 2021 година и Законот за изменување на Законот за данокот на личен доход, сите по скратена постапка.
За овие закони гласаа и пратениците од опозицијата, според листата што ја прочита спикерот Талат Џафери на пратеници со оправдано отстуство, беа тројца од Алијанса/Алтернатива – Скендер Реџепи, Зијадин Села и Африм Гаши.
Сите овие закони беа на дневен ред на 36-та седница, која минатата недела не можеше да се одржи, бидејќи спикерот Џафери инсистираше пред тоа да ја завршат 32-та седница со триесетина точки, што пратениците од ВМРО-ДПМНЕ одбиваа и тактизираа со кворумот, стоејќи во ходниците.
Поради ова, владејачкото мнозинство, кое не можепше да обезбеди кворум без опозицијта поради тројца пратенци кои беа во изолација поради ковид, денеска донесе двајца од нив, кои во скафандери беа во кабините во горниот дел од салата од каде гласаа.
И покрај процедуралната забелешка на пратеникот од Левица, Димитар Апасиев, кој повикувајќи се на Кривичниот законик, забележа дека двајцата пратеници кои се во изолација, со доаѓањето во Собранието го загрозуваат јавното здравје по член 205 и 206 од КЗ, сепак се гласаше и седницата заврши.
Апасиев го обвини Џафери за кривично дело против здравјето на населението и најави тужби за пратениците кои иако заразени денеска дошле на работа.
По завршувањето на 32-та седница, Џафери ја започна 36-та, по што се отворија вратите од салата и пратениците од ВМРО-ДПМНЕ влегоа во салата.
На почетокот, кородинаторот на пратеничката груп на ВМРО-ДПМНЕ Никола Мицевски ги повтори ставовите кои ги кажа и на прес-конференцијата еден час порано, дека пратениците со ковид се закана за здравјето на сите во Собранието и дека за ив не важат законите како и заа другите граѓани. Тој на говорницата излезе со две маски и рече дека не ги вади ниту кога зборува, бидејќи „тука шетаат заразени пратеници“.
Ставот на Џафери на сите овие забелешки беше дека се е според протоколите и дека заразените пратеници се изолирани во кабините, и се движеле според одредени правила.
Истото ова на прес – конференција пред почетокот седницата го кажа и координаторот на пратеничката група на СДСМ Јован Митрески, кој рече дека не е прв пат да гласаат пратеници кои се во изолација, дека тоа било и при гласањето за избор на Владата.
Тој рече дека се работи за двајца пратеници, а дека третиот кој исто така до вчера беше во изолација, денеска излегол и редовно учествува на седницата.