Во своето обраќање од Регионалниот форум на Унијата на Медитеранот, министерот Бујар Османи кажа дека со приклучувањето кон организацијата Северна Македонија ќе се обиде да придонесе за промовирање на растот, вработувањето, регионалната кохезија и социоекономската интеграција, додавајќи вредност на севкупните односи во Евромедитеранскиот регион
Со едногласната одлука на министрите за надворешни работи на 42 земји членки на Унијата на Медитеранот, Северна Македонија станува полноправна членка во оваа организација. Унијата на Медитеранот е организација која ги вклучува сите земји членки на Европската Унија како и медитеранските земји кои не се дел од ЕУ.
За време на Регионалниот форум на Унијата за Медитеранот што денеска се одржува во Барселона, министерот за надворешни работи Бујар Османи при своето обраќање изрази благодарност за дадената доверба и за препознавањето на вистинскиот интерес на Северна Македонија да се приклучи кон Унијата.
„Нашето учество во Унијата на Медитеранот, како платформа за регионална соработка и дијалог, ќе ни овозможи како земја со отпочнати преговори за членство во ЕУ, поблиско вмрежување и интеграција на Северна Македонија во европските структури што го покриваат медитеранскиот басен и соодветна интеракција со земјите од Европската Унија и петнаесетина земји од Јужниот и Источниот Медитеран“,
рече Османи.
Османи, меѓу другото, истакна дека Северна Македонија, со својата традиција на меѓуетнички дијалог, кохезија и мирно решавање на билатерални спорови, придонесува за стабилноста на Југоисточна Европа преку промовирање на европските вредности, добрососедски односи, регионална соработка и културата на дијалог.
Додаде дека со денешното приклучување во работата на организацијата, Северна Македонија ќе се обиде да придонесе за промовирање на растот, вработувањето, регионалната кохезија и социоекономската интеграција, додавајќи вредност на севкупните односи во Евромедитеранскиот регион.