Тревога за воздушен напад имаше и во Тел Авив бидејќи беспилотно летало наводно се приближувало до областа Глилот каде што се наоѓа седиштето на израелската надворешна разузнавачка служба Мосад и уште еден разузнавачки центар
Израелската армија соопшти дека од Либан кон Израел биле лансирани три беспилотни летала од кои едното погодилo зграда во Цезареја. Портпаролот на израелскиот премиер изјави дека еден од дроновите бил насочен кон резиденцијата на израелскиот премиер Бенјамин Нетанјаху, но дека тој не бил во близина и додаде дека во нападот нема жртви.
Медиумите рано утринава објавија дека силна експлозија се слушнала во Цезареја поради, според полицијата, „очигледен напад со дрон“.
И армијата соопшти дека во инцидентот нема повредени и дека се пресретнати уште два летечки објекти без екипаж.
Тревога за воздушен напад имаше и во Тел Авив, 55 километри јужно, бидејќи беспилотно летало наводно се приближувало до областа Глилот, каде што се наоѓа седиштето на израелската надворешна разузнавачка служба Мосад и уште еден разузнавачки центар.
Според армијата, сирените се огласиле на многу други локации во северен Израел, вклучувајќи го и градот Тиберија на западниот брег на Галилејското Море.
Либанската шиитска милиција Хезболах, која е во сојуз со Хамас во Појасот Газа, речиси секојдневно истрелува ракети и беспилотни летала врз Израел од почетокот на војната во Газа во октомври минатата година.
По веста за смртта на лидерот на Хамас, Јахја ал Синвар во Газа, милицијата поддржана од Иран најави „нова фаза на ескалација“.