Како би било тоа и преку која институција на Европската Унија би бил механизмот, да се остави на идна влада предводена од ВМРО-ДПМНЕ да преземе таков товар на одговорност, но без јасни гаранции, јас верувам дека таков процес не би бил одржлив, рече потпретседателот на ВМРО-ДПМНЕ и повтори дека до добивање такви гаранции неговата партија нема да поддржи уставни промени за внесување на Бугарите
Со добра комуникација и дипломатска офанзива, во корелација со земјите членки и институциите на Европската Унија, мислам дека е возможно да се разговара за некоја форма на гаранции дека земјава нема повторно да биде уценувана од Бугарија во пристапните преговори со ЕУ, рече потпретседателот на ВМРО-ДПМНЕ, Тимчо Муцунски, во емисијата „360 степени“ на ТВ Алсат. Но, додаде Муцунски, тоа треба да се остави да го издејствува идна влада предводена од ВМРО-ДПМНЕ.
Запрашан за тоа дали актуелните случувања на политичката сцена (со најавеното влегување на Алијанса за Албанците во владата) и ставот на партиите на Албаниците би можел да ја натера ВМРО-ДПМНЕ да размисли за промена на ставот за уставните измени, Муцунски рече дека позицијата на ВМРО-ДПМНЕ е конзистентна и дека под вакви околности пратеничката група нема да се согласи со уставни промени.
„Кога Владата даваше ветување, кога преземаше обврски претходното лето, кога Владата дозволи со наша согласност да ги погазиме и фундаменталните принципи и вредности на самата Европска Унија, требаше да размислува за евентуални последици од сите преземени опции. Вие не може да ветувате двотретинско мнозинство доколку однапред не сте го обезбедиле. Ние, во однос на прашањето за преговорите со Бугарија, нудевме постојана отвореност, нудевме заедно да ѝ помогнеме на Владата да најде решение за ова прашање со конкретна понуда на тим што ќе се приклучи на владиниот тим. Тогаш имаше молк и немаше желба за комуникација со ВМРО-ДПМНЕ и со луѓе што имаат и познавања и контакти и искуство во меѓународните односи“,
рече Муцунски.
Тој вели дека како резултат на молкот сега реперкусиите од неможноста да го реализираат тоа што го ветиле ќе се бара кај тој што ја преземал одговорноста.
Прашан под какви околности би поддржале уставни измени, потпретседателот на ВМРО-ДПМНЕ рече дека прво сакаат да разговараат какви гаранции би имала Македонија дека нема да биде предмет на ваков профил на уцена што го добиваме од еден наш сосед кој не е базиран на стандарди на ЕУ.
На забелешката дали воопшто е можно да се дабијат некакви гаранции од ЕУ, со оглед на начинот на кој функционира Унијата, Муцунски одговори:
„Верувам дека е возможно со добра комуникација и добра дипломатска офанзива, во корелација со земјите членки и институциите на Европската Унија. Јас мислам дека е возможно со чинителите во Брисел да се разговара за некоја форма на гаранции. Како би било тоа и преку која институција на Европската Унија би бил механизмот, да се остави на идна влада предводена од ВМРО-ДПМНЕ да преземе таков товар на одговорност, но без јасни гаранции, јас верувам дека таков процес не би бил одржлив“,
вели Муцунски.
Според него, за да се преземе какво било решение треба да се има согласност од граѓаните, а односот на Бугарија кон ова прашање и повторното брзоплето влегување во процес на уставни измени евоцира спомени од носењето на Преспанскиот договор кој бил презентиран како решение што ќе го гарантира европскиот пат на Македонија.
За евентуалниот влез на Алијанса за Албанците во Владата, Муцунски вели дека е изненаден од ставот на партијата, бидејќи во последните неколку години таа постојано ги нагласувала недоследностите на владеењето на ДУИ и СДСМ.
„Кои се тие автентични намери што вие ќе ги постигнете во 11 месеци со неколку ресори и неколку директорски места? Мене ме загрижува автентичноста на нивното опозициско дејствување доколку одлучат да влезат во Владата“,
кажа Муцунски.
Муцунски не ја отфрли можноста влезот на Алијанса за Албанците во Владата да претставува инвестиција во заедничка предизборна широка коалиција на сите владини партии за следните избори, но вели дека со евентуалниот влез тие би ги прегазиле вредностите и ставовите што ги застапувале до пред еден месец, а во политиката, вели тој, треба да се остане конзистентен.
На прашањето дали ВМРО-ДПМНЕ останува изолирана од партиитена Албанците, тој вели дека со БЕСА имаат добра соработка и делат повеќе ставови во однос на борбата против корупцијата, реформата на правосудството и економијата.