Во рамките на дискусијата пред гласањето, пратениците на СДСМ дадоа многу забелешки на Договорот, а координаторот на пратеничката група на опозициската партија, Оливер Спасовски, ја доведе во прашање неговата владиност, бидејќи во англиската верзија, како што кажа, има две недоследности кои го прават Договорот ништовен
Пратениците од најбројната партија од парламентарното мнозинство – ВМРО-ДПМНЕ, пак, во одбрана на Договорот рекоа дека тој е историски и од него нема да трпи ниту еден граѓанин, туку напротив, тој ќе придонесе за зголемување на бруто-домашниот производ (БДП) и ќе донесе повеќе директни странски инвестиции
Со 76 гласа „за“ собраниското мнозинство попладнево го донесе Законот за ратификација на Договорот „влада со влада“ меѓу Северна Македонија и Обединетото Кралство во врска со партнеството за реализација на инфраструктурни проекти.
Против Законот за ратификација се изјаснија шест пратеници од опозицијата, а воздржани немаше.
„Констатирам дека Собранието го донесе Законот за ратификација на Договорот меѓу владата и владата на Обединетото Кралство на Велика Британија и Северна Ирска во врска со партнерството за реализација на инфраструктурни проекти“,
кажа по гласањето потпретседателката на законодавниот дом, Весна Бендевска која ја водеше денешната 52. пленарна седница.
Додека траеше гласањето, а бројките на екраните во собраниската сала покажаа дека Законот за ратификација ќе ја добие потребната поддршка, извици на негодување – „уа“ можеа да се слушнат од дел од пратениците на Левица.
Гласањето уследи по неколкучасовна дебата која беше прекинувана со две долги паузи.
Првата беше побарана токму од пратеничката група на Левица, чии пратеници рекоа дека не им е сосема јасно за што ќе се дискутира и гласа во Собранието бидејќи, како што наведоа, Предлог-законот бил доставен во Собранието доцна вчера.
Пауза потоа побараа и пратениците на опозицискиот Социјалдемократски сојуз на Македонија кои ја доведоа во прашање валидноста на Договорот.
Ставот на опозиционерите во процедурална забелешка од собраниската говорница го кажа координаторот на пратеничката група на СДСМ, Оливер Спасовски, кој наведе две недоследности во англиската верзија на договорот, кои, како што кажа, го прават документот ништовен.
Како што наведе, Спасовоски во македонската верзија на документот стои дека станува збор за договор меѓу владите на двете земји, додека во англиската се користи англискиот термин „arrangement“, односно спогодба, што би бил предводот на македонски јазик.
Вториот момент на кој укажа пратеникот на СДСМ и кој како што кажа го прави ништовен овој документ, е тоа што во англиската верзија стои дека го потпишал потпретседател на Република Северна Македонија, односно функција што не постои во македонскиот правен систем.
На наводите на Спасовски реплицираше заменик-министерот за надворешна политика и надворешна трговија, Зоран Димитровски која кажа дека според него во случајот станува збор за техничка грешка само во англиската верзија и оти тоа може да се поправи со размена на ноти меѓу двете држави.
Во дискусијата која следеше по паузите, пратениците на СДСМ дадоа многу забелешки на Договорот, кој како што рекоа, отвора многу дилеми за заемот и за каматите.
„Знаеме дека одобрената рамка за задолжување е шест милијарди евра или еднакво на еден наш годишен буџет. Знаеме дека ќе биде проектно финансирање, но не знаеме кои се другите услови, колкава ќе биде каматната стапка, како ова задолжување ќе влијае на зголемувањето на јавниот долг. Граѓаните заслужуваат јасни и прецизни одговори на овие прашања, затоа што политичарите доаѓаат и си одат, но долгот ќе остане да го плаќаат нашите деца, идните генерации. Граѓаните мора да знаат како ова задолжување ќе се рефлектира на нивниот живот во иднина“,
рече пратеникот на СДСМ, Митко Трајчулески.
Според него загрижува и капацитетот за реализација на големи инфраструктурни проекти, имајќи ја предвид досегашната реализација на капитални проекти која, како што рече е поразителна.
Пратеникот од најбројната партија од парламентарното мнозинство – ВМРО-ДПМНЕ, Бојан Стојановски, пак, во одбрана на позициите на мнозинството дека станува збор за историски Договорот, рече дека од него ниту еден граѓанин нема да трпи, туку напротив, тој ќе придонесе за зголемување на Бруто-домашниот производ (БДП) и повеќе директни странски инвестиции.
„Дозволете да ви објаснам во што е поентата, од тоа што се пропагираше во јавноста сте стекнале одреди впечатоци за информации коишто не се точни. Зошто нема да порасне јавниот долг? Бидејќи кога некој вложува во вакви капитални инвестиции расте Брутодомашниот производ (БДП). Тоа е заради три фактори. Првиот е затоа што градежништвото има мултипликативен ефект на двапати или трипати вртење на тие средства во економијата. Второ ќе има повеќе вработени коишто ќе треба да бидат ангажирани на овие проекти и трето заради изградбата на овие проекти ќе има повеќе странски директни инвестиции што во економијата е златно правило за намалување на јавниот долг“,
рече Стојановски.
Во врска со Договорот со Велика Британиј, денеска одговарајќи на новинарски прашања говореше и премиерот Христијан Мицкоски.
Тој кажа дека вкупната каматна стапка за заемот од договорот со Обединетото Кралство ќе биде пониска од маргината 4,5 проценти и појасни дека ние го користиме кредитниот рејтинг на Обединетото Кралство што е трипати А, кое, како што кажа, е најдоброто што во овој момент може да го добиеме како земја на пазарот.