Навремените прегледи и грижата за сопственото здравје на трудниците се клучот за стабилна бременост и зачувување на здравјето на бебињата, порачуваат здравствените власти
Од 2016 година до денес, смртноста кај предвремено родените бебиња е намалена од 25 на 8,9 отсто односно за 16,1 отсто.
Со вакви статистики утрово излегоа од Министерството за здравство по повод Денот на предвреме родените деца.
„Работиме посветено овој процент да продолжи да се намалува, преку инвестирање во најсовремена опрема, обезбедување најдобри услови, обуки и едукација на лекарите и медицинскиот персонал кој се грижи за овие наши мали борци. Здравјето на нашите деца е секогаш врвен приоритет. На денот на предвреме новородените деца, сакам да порачам дека навремените прегледи и грижата за сопственото здравје на трудниците се клучот за стабилна бременост и зачувување на здравјето на бебињата“,
вели министерот Венко Филипче.
Од Министерството велат ваквите резултати се последица и на тоа што изминатите години се унапредени условите на Клиниката за гинекологија и акушерство (ГАК), се вложувало во моерна опрема и обуки.
„Во изминатиот период набавивме 15 модерни инкубатори, нешто што недостасуваше на Клиниката, но и низа други апарати и опрема, како микроскопи, системи за деминерализација, респираторни машини, подвижни протокомери за кислород и друга опрема. Оваа опрема беше нужна да се понуди најдобрата услуга, а со тоа и да се спасат што е можно повеќе млади животи. Денес ГАК располага со врвна апаратура, знаење и мотивиран персонал кој работи по светски стандарди“,
велат од Министерството.