„По насока на ВМЦ, професионални војници се упатени на превентивен контролен преглед. Досега се регистрирани четири лица, на кои им е пропишана соодветна медицинска терапија“, пишува во соопштението од ова министерство
Случајот со шуга кај професионални војници не потекнува од касарната „Алексо Демниевски Бауман“ во Велес, информираат денеска од Министерството за одбрана (МО), апелирајќи да не се манипулира јавноста и да не се прави злоупотреба на поединечен случај, со што се нанесува директна штета на угледот на Армијата.
„Станува збор за поединечен случај, што не е заразен во касарната. Министерството за одбрана и Армијата на чело со Генералштабот во континуитет работат на подигнување на стандардите и условите за работа што подразбира комплетно реновирање и реконструкција на објектите во кои функционираат припадниците на АРМ. Само за илустрација, за 2026 и 2027 година се предвидени 41 300 000 денари за реконструкција и санација на објектите и градежно-занаетски работи“,
се вели во соопштението од Министерството за одбрана.
По потврдените случаи на шуга, како што велат оттаму, Воено-медицинскиот центар (ВМЦ), согласно здравствените протоколи, презема мерки за спречување на натамошно евентуално ширење на оваа заразна болест.
„Одделението за превентивна заштита од ВМЦ изврши стручен епидемиолошки надзор и даде мислење, како и понатамошни насоки и препораки“,
велат од ресорното министерство.
На превентивен преглед се испратени сите војници што биле во контакт со заразените лица.
Исто така, војниците се информирани за симптомите што можат да се појават како резултат на оваа болест, како и доколку забележат кожни промени, веднаш да се јават на лекар.
„По насока на ВМЦ, професионални војници се упатени на превентивен контролен преглед. Досега се регистрирани четири лица и на истите им е пропишана соодветна медицинска терапија“,
пренесуваат од Одбрана.
За време на викендот, во просториите каде што се сместени војниците е извршена комплетна замена на постелнината, направена е дезинфекција на сите спални соби, дезинфекција на ќебињата, перниците и душеците, и испрана е постелнината.
Според Министерството, во велешката касарна, како и во другите Центри за обука (АП Криволак, ЦО Пепелиште, Кампот за обука на вода) на годишно ниво престојуваат голем број припадници, како од Армијата, така и од сојузничките армии, при што досега не е регистриран ваков случај.
Пред два дена, од АРМ информираа дека има два потврдени случаи на шуга кај војници во велешката касарна.
Оттаму информираа и дека заразените војници се во изолација, а како превентивна мерка, сите новопримени професионални војници што се обучуваат во Командата за обука и доктрини се пуштени дома.