Ѓинпинг по средбата со Моди рече дека Кина и Индија, како две древни источни цивилизации и двете најнаселени земји во светот, се важни членови на глобалниот југ и дека тие ја носат одговорноста за благосостојбата на своите народи
Кинескиот претседател Си Ѓинпинг денеска за време на средбата со индискиот премиер Нарендра Моди нагласи дека Кина и Индија се партнери во соработката и дека двете земји една за друга се развојни можности, а не закани.
Кинеското МНР по средбата на двајцата лидери соопшти дека „танцот на змејот и слонот“, односно постигнувањето добрососедски пријателски и партнерски односи меѓу двете земји, треба да биде вистинскиот избор.
Ѓинпинг рече дека Кина и Индија, како две древни источни цивилизации и двете најнаселени земји во светот, се важни членови на глобалниот југ и дека тие ја носат одговорноста за благосостојбата на своите народи, промовирањето на единството и ревитализацијата на односите меѓу земјите во развој и унапредувањето на напредокот на општеството.
Годинава се одбележуваат 75 години од воспоставувањето дипломатски односи меѓу Кина и Индија.
Кинескиот претседател смета дека двете земји треба да ја зајакнат стратегиската комуникација и да ја продлабочат меѓусебната доверба. Тој, исто така, посочи оти Индија и Кина треба да ги прошират размената и соработката со цел да постигнат меѓусебна корист и меѓусебно корисни резултати.
Си рече дека Кина и Индија мора заеднички да покажат историска одговорност, да го поддржат мултилатерализмот, да ги зајакнат комуникацијата и соработката за важни меѓународни и регионални прашања, да ги бранат меѓународната праведност и правда, да работат заедно за промовирање на мултиполарен свет и демократизирање на меѓународните односи и да го дадат својот должен придонес за одржување на мирот и просперитетот во Азија и во светот.