Мицкоски додаде дека на вчерашната владина седница била продолжена кризната состојба. Најави и дека ќе имаат дополнителна седница, на која ќе се донесе мерка со која ќе се држи данокот на додадена вредност на 10 проценти наместо на 18 проценти
Состојбата со нафтените деривати е стабилна и непроменета, вели премиерот Христијан Мицкоски. Според него, нафтените резерви се исти како почетокот на кризата и не е потрошен ниеден литар.
Следејќи ги берзанските движења, каде што нафтата „брент“ и американската ВТИ се движат 90-91 долар за барел, премиерот очекува дополнително поевтинување на горивата веќе од следниот понеделник.
Мицкоски, одговарајќи на новинарско прашање за состојбата со нафтените деривати, изнесе факти со кои ја илустрира моментната состојба.
„Состојбата е стабилна, непроменета, конзумот е ист, не паѓа. Имаме денови со над два милиони литри кога се испорачува дизел-гориво и безоловен за нашите граѓани, но и за соседните земји. Факт број 2, имаме убедливо најниски цени на горива во регионот. Факт број 3, единствена држава во оваа регулирана недела ги намали цените на дизелот и на бензините. Факт број 4, стабилни сме како никогаш досега, Факт број 5, веќе не коленичиме да бараме милост. Така ќе продолжи оваа Влада да работи, стабилно во интерес на граѓаните“,
кажа Мицкоски.
За тоа дали по 20 април Владата ќе ја продолжи мерката за намалено ДДВ за нафтените деривати, Мицкоски рече дека од она што го следи, најмалку ќе останат истите цени на горивата, а можно е дополнително намалување следната недела.
Мицкоски додаде дека на вчерашната владина седница била продолжена кризната состојба. Најави и дека ќе имаат дополнителна седница, на која ќе се донесе мерка со која ќе се држи данокот на додадена вредност на 10 проценти наместо на 18 проценти.
„Во зависност од цените на берзите така ќе бидат и акцизите. Има таму, во согласност со законот, колкави треба да бидат тие попусти“,
додаде Мицкоски.
Попустот со ОКТА, како што рече, е договорен до крајот на април, а се преговара и за дизел-горивото.
„Тоа е приближно 75 проценти од вкупното потрошувачко портфолио, барем уште некој дополнителен попуст да извадиме, барем уште еден денар за литар“,
рече Мицкоски.