Како што рече ексминистерот за финансии на прес-конференција во ВМРО-ДПМНЕ, ова е поразително затоа што зборува дека Владата не обезбедила средства за помош на претпријатијата, така што поддршката за нив доцни
Наместо за изградба на патиштата, средствата доделени од Светска банка за таа намена се пренасочуваат за тековни расходи, оцени денеска поранешниот министер за финансии Трајко Славески на прес-конференција во ВМРО-ДПМНЕ, коментирајќи за помошта од државата за исплата на минималец за мај и април за приватните фирми погодени од корона-кризата.
Тој, исто така, забележа дека Владата неколкупати ги менува условите за исплата на минималец за фирмите.
„Колку што се сеќавам, ова е трето менување на условите за поддршка на претпријатијата за минимална плата во износот на платите погодени од кризата. На денешниот прес, Нина Ангеловска кажа дека средствата се обезбедени или ќе се обезбедат од Светска банка, како што беше кажано, од средства што беа наменети за изградба на локални патишта низ Македонија. Ова е поразително затоа што зборува дека Владата не обезбедила средства за платите за помош на претпријатијата. И сега, наместо да се градат проектите, да се ангажира градежната оператива, средствата се наменуваат за тековни расходи. Тоа е првата негативност“,
рече Славески одговарајќи на новинарско прашање за оваа економска мерка на Владата за справување со последиците од здравствената криза.
Како втора негативност Славески го посочува менувањето на условите, со што, како што вели, се внесува забуна кај заинтересираните фирми.
„Ние веќе требаше да имаме двапати досега алоцирани средства за фирмите, наместо да им кажуваме ова се новите услови кои, пак, се комплицирани и пак ги збунуваат тие што се заинтересирани. Наместо да дополнуваме средства за поддршка на претпријатијата, ние се занимаваме со условите и кажуваме дека средствата ќе почнат да се распределуваат по аплицирањето, таму некаде во месец мај, не знаеме ни кога, во услови кога земји и од соседството и од Европа и од светот веќе на големо ги поддржуваат претпријатијата кои беа зафатени со кризата“,
рече Славески.
*поврзани вести: Директорката на УЈП објасни како фирмите може да аплицираат за минимална плата за работниците
ССМ контра Ангеловска: Државата не смее да финансира отпуштање работници!