Славески најави и дека со предлог-измените на Народната банка, граѓаните ќе добијат пристап до мобилно банкарство, дебитна картичка, подигнување готовина и електронски трансакции за месечен надомест од 36 денари, а за ранливите категории – бесплатно
Народната банка предлага граѓаните да добијат право на четири бесплатни подигнувања месечно од банкомати на други банки, во износ до 2 000 денари по трансакција. Според гувернерот Трајко Славески, целта е да се обезбеди достапност до готовина за сите граѓани, без разлика на тоа во која банка имаат сметка.
Мерката би требало да стапи во сила на почетокот на 2026 година.
„Готовината и понатаму ќе ја користи мнозинството граѓани, иако во помал обем. Препорачливо е дома да се има готовина за основните потреби за период од барем неколку дена до недела“,
наведе гувернерот на социјалната мрежа Икс додавајќи дека приврзаниците на кешот ја истакнуваат неговата анонимност и слобода, што, според него, е став кој треба да се почитува.
🏧 Народната банка предлага 4 бесплатни подигнувања месечно од банкомати на други банки (до 2.000 денари). Целта: достапност до готовина за сите, независно од која банка е банкоматот. Рок: почетокот на 2026 година.
— Trajko Slaveski (@TSlaveski) August 10, 2025
Готовината и понатаму ќе се користи од мнозинството граѓани, се…
Истовремено, Славески истакна дека постои нерамномерна покриеност со банкомати низ земјата, поради што ќе се иницира создавање на национална мрежа на банкомати. Таа мрежа ќе се потпира на постојната инфраструктура на банките, со план за надградба и оптимизација во интерес на граѓаните и самите банки.
Според плановите, националната мрежа на банкомати треба да заживее до крајот на 2026 година.
Гувернерот се осврна и на платежната сметка со основни функции, која според него треба да стане навистина функционална и достапна за пошироката јавност. Со предлог-измените на Народната банка, граѓаните ќе добијат пристап до мобилно банкарство, дебитна картичка, подигнување готовина и електронски трансакции за месечен надомест од 36 денари, а за ранливите категории – бесплатно.
💳 Една сметка. Сите услуги. 36 денари месечно.Платежна сметка со основни функции.
— Trajko Slaveski (@TSlaveski) August 7, 2025
Со новите измени, ќе добиете пристап до:
мобилно банкарство
дебитна картичка
подигнување готовина
електронски трансакции
Ранливите категории? – Бесплатно.
„Само 140 граѓани досега ја користат платежната сметка со основни функции, а причината се ограничувањата,“ Затоа, Народната банка предлага законски измени кои ќе ја направат оваа сметка достапна, практична и исплатлива за илјадници луѓе во земјата. Меѓу новините е можноста граѓаните да користат дозволено пречекорување преку платежната сметка со основни функции, како и да ја отворат без да ги затворат постојните сметки во други банки. Целта е јасна – вистинска финансиска вклученост за сите“,
порача гувернерот Славески.