Скринингот за ковид неделава на повеќе места во Скопје, а потоа и во другите градови – локациите не се откриваат предвреме

Скринингот во Скопје започна денеска, а како прва локација беше избрана улица „Македонија“ во центарот на градот. Во главниот град ќе бидат опфатени околу 1 000 граѓани, а 2 000 до 3 000 граѓани во другите градови

Скрининг-тестирањето по случаен избор кое треба да покаже колкав процент граѓани имаат хуморален имунитет кон коронавирусот оваа недела планирано е да се одвива на различни локации во Скопје, изјави денеска асистент доктор Теодора Брњарчевска од Институтот за имунобиологија и хумана генетика на Медицинскиот факултет во Скопје.

„Не ги откриваме локациите со цел да ги фатиме случајните минувачи, да бидат поставени екипи кои ќе земаат примероци од минувачите кои ќе бидат заинтересирани да дадат свој примерок за определување на антитела, со цел да процениме каква е епидемиолошката состојба во Скопје, односно колку има стекнат имунитет кај граѓаните од вакцинација или од прележување болест. Ова ќе го правиме и низ целата држава, со тоа што ќе биде во соработка со центрите за јавно здравје и со трансфузиолошките служби. Исто така избирањата ќе бидат по случаен избор на испитаниците, и целта е на ниво на Скопје и на ниво на Македонија да се процени колкав процент граѓани имаат хуморален имунитет кон коронавирусот“,

рече асистент доктор Брњарчевска.

Скринингот во Скопје започна денеска, а како прва локација беше избрана улица „Македонија“ во центарот на градот.

(ГАЛЕРИЈА) Почна скринингот за ковид: На улица „Македонија“ се земаат примероци на крв од граѓани

Скрининг-тестирањето во поголемите градови, пак, ќе се прави во текот на следната недела.

„Со резултатите од другите градови ќе направиме еден пресек после сите овие бранови на коронавирусот и после вакцинацијата какво е нивото на имунитетот на ниво на Македонија, додека пак со оние испитаници од Скопје ќе направиме споредба какво било лани пред вакцинацијата, оваа година, со вакцинацијата и сите бранови на коронавирусот. Пред да ги вклучиме испитаниците им даваме прашалник за тоа дали се вакцинирани, со која вакцина се вакцинирани, дали имаат прележано еднаш, неколку пати, кога било тоа и на тој начин ќе направиме една статистичка обработка на податоците и ќе излеземе со соодветните резултати“, 

вели Брњарчевска.

Таа додаде дека со скрининг-тестирањето за ковид-19 ќе бидат опфатени околу 1 000 граѓани во Скопје, а 2 000 до 3 000 граѓани во другите градови.