Пролонгирано тестирањето на вработените во најголемата штипска градинка
Одложено е тестирањето на вработените во детската градинка „Астибо“-Штип, каде што има и најголем број вработени во петте клонови низ градот, јави МИА.
Директорката на градинката „Астибо“, Билјана Трајчевска, вели дека епидемиолозите од Центарот за јавно здравје-Штип ги известиле дека тестирањето ќе биде одложено бидејќи се прави масовен скрининг на текстилните работнички кои работат во конфекцијата од каде што почна да се шири заразата и на работничките од други конфекции кои се превезувале во истите автобуси од оваа конфекција.
„Во нашата установа денеска требаше да се тестираат 137 вработени од петте клонови, вклучувајќи ги сите вработени меѓу кои и администрацијата“,
вели Трајчевска.
Таа додава дека тие како установа ги преземаат сите мерки и протоколи.
Штипскиот Центар за јавно здравје од денеска требаше да го почне тестирањето на вработените во градинките во Штип, Пробиштип, Карбинци, Конче и Радовиш. Според списоците кои ги имаат добиено во штипската градинка „Астибо“ треба да се тестираат вкупно 137 вработени, а во „Вера Циривири-Трена“ 91 лице. Во градинките во Радовиш има 78, потоа во Пробиштип 58, во Општина Конче има 10 и во Карбинци деветмина вработени во детската градинка.