„Ова е првата фаза од вкупно пет фази, преку кои овој комплексен капитален зафат конечно ќе биде реализиран. Иако третата фаза, подземната сообраќајница е веќе изградена, нејзиното целосно ставање во функција е возможно само со реализација на сите фази, од кои првата почнува токму денеска“, вели скопскиот градоначалник
Почнува изградбата на првата фаза од булеварот „Македонија“, со што главниот град е на чекор поблиску до својата прва подземна сообраќајница. Ова денеска го соопшти скопскиот градоначалник Орце Ѓорѓиевски, означувајќи го стартот првата фаза на градежните активности за булеварот „Македонија“ кај хотел „Лимак“ во центарот на градот.
Со изградбата на овој булевар, како што рече, се очекува да се намалат сообраќајните гужви. Рокот за изведба на првата фаза е 90 дена, а од следната недела ќе почне тендерската постапка и за втората фаза.
„Ова е првата фаза од вкупно пет фази, преку кои овој комплексен капитален зафат конечно ќе биде реализиран. Иако третата фаза, подземната сообраќајница е веќе изградена, нејзиното целосно ставање во функција е возможно само со реализација на сите фази, од кои првата почнува токму денеска“,
рече тој.
Во рамки на оваа фаза ќе се изврши реконструкција и рехабилитација на постоечкиот коловоз, како и проширување на одделни коловозни ленти, со цел значително подобрување на проточноста и функционалноста на сообраќајот.
„Проектот го опфаќа булеварот ‘Борис Трајковски‘ (кај Рампа), улицата ‘11 Октомври‘, улицата ‘Пролет‘, како и крак од булеварот ‘Македонија‘ до влезот во булеварот ‘Борис Трајковски‘, каде што завршува со вклинување во постоечкиот профил и продолжува кон втората фаза“,
кажа скопскиот градоначалник.
Во оваа фаза се предвисува и проширување на улицата „Пролет“ во правец на полициската станица до „Тутунскиот комбинат“, со дополнителна коловозна лента. На овој потег, раскрсницата ќе биде уредена со два острови во форма на триаголник и три острови во форма на солза.
Од улицата „Пролет“ кон хотел „Лимак“, како и од таму кон булеварот „Борис Трајковски“ се воведува еднонасочен сообраќај.
Во другите фази од проектот, се предвидува кружен тек кај зградата на поранешна „Нова Македонија“, како и уште два меѓу булеварот „Кочо Рацин“ и улицата „Јордан Мијалков“, како и проширување на булеварот „Св. Кирил и Методиј“.
Зборувајќи за подземната сообраќајница, Ѓорѓиевски вели дека таа ќе располага со вкупно шест ленти, четири за двосмерен автомобилски сообраќај, две неманети за јавен превоз, како и дополнителни пешачки патеки.
„Со нејзиното пуштање во употреба се очекува намалување на сообраќајниот метеж, побрзо и поефикасно движење низ центарот“,
веели тој.
Според него, овој проект претставува ново поглавје во развојот на Скопје.