Осомничениот со пиштол им се заканувал на вработените, а откако го извршил делото, пиштолот го фрлил во Вардар и избегал за Хрватска
Основното јавно обвинителство Скопје поведе истражна постапка против 25-годишен скопјанец за разбојништво. Осомничениот, како што се наведува од Обвинителството, во два наврати влегол во компанија за брзи кредити, од каде што зел одредена сума пари и со оружје им се заканувал на вработените.
„На 15 август годинава извршил разбојништво во просториите на правно лице за брзи кредити во ГТЦ, од каде што со закана со огнено оружје – пиштол кон вработената одзел пари во вкупен износ од 60 500 денари. Тој влегол во објектот и седнал на едно од столчињата за странки, а кога оштетената го прашала колку пари сака, осомничениот извадил пиштол и ѝ рекол да ја отвори касата. Вработената, исплашена за сопствениот живот, од фиоката ја извадила касата, ја ставила на бирото и ја отворила, па осомничениот ги зел сите пари што биле внатре и избегал“,
наведуваат од ОЈО Скопје.
Три дена подоцна, од објект на истото правно лице во Старата скопска чаршија, осомничениот на сличен начин, заканувајќи се со пиштол, го натерал вработениот да го отвори сефот и одзел 25 000 денари.
„Ја напуштил продавницата упатувајќи се во правец на плоштадот „Македонија“. По пат го фрлил пиштолот од Камениот мост во Вардар, по што избегал во непознат правец. По настанот, осомничениот извесен период бил недостапен за органите на прогонот бидејќи избегал во Хрватска“,
додаваат од Обвинителството.
Од Обвинителството оценуваат дека сè уште постои висок ризик тој повторно да се даде во бегство за да го избегне кривичниот прогон, но и веројатност да го повтори делото, па од судијата на претходна постапка бараат на осомничениот да му биде определена мерка притвор.