Со стапување во сила на новиот закон ниту борбата за правда застанува ниту живото тука застанува, изјави денеска обвинителката Фатиме Фетаи која беше една од најистакнатите обвинителки во Специјалното јавно обвинителство, кое со стапувањето во сила на новиот Закон за ЈО и официјално престанува да постои.
„Тоа единствено претставува една нова законодавна рамка која ни дава можност на сите обвинители заеднички на нов начин да се справиме и да се бориме против криминалот. Како и на кој начин ние ќе го искористиме тоа, зависи од сите обвинители“,
изјави Фетаи посочувајќи се себеси како пример. Таа денеска беше застапник на обвинението за „Монструм“, случај што го презеде СЈО, а сега премина во рацете на ЈО.
Уште една од обвинителките која покрај шефицата на СЈО Катица Јанева и Фетаи беше експонирана во јавноста, беше застапник на повеќе обвиненија и портпарол на СЈО, Ленче Ристоска, преку Фејсбук се збогуваше со оваа институција нарекувајќи го денешниот ден горчливо сладок.
„За мене СЈО беше симбол за борба за идеали, за борба за правда, интегритет, подобра иднина, борба против злоупотреби на системот, на послабите, на зависните, борба против неказнивост. Начинот на кој згасна СЈО, начинот на кој никој не најде храброст изречно да каже дека се укинува институцијата, мислам дека не заслужува коментар, затоа што борбата за правда е вистинска само кога е плод на внатрешен порив за одговорност, првенствено лична, па потоа на сите кои грешеле пред законите, порив за нетолеранција на неказнивост, порив за принципиелно и однесување со интегритет“,
напиша Ристоска на својот профил на Фејсбук.
Државниот јавен обвинител Љубомир Јовески, во интервју за МИА, по повод стапувањето во сила на новиот Закон за јавно обвинителство вели дека Обвинителството нема да ја повтори грешката, кога поради непостапување по конкретните случаи се формира СЈО и уверува дека овие предмети ќе добијат завршница.
И покрај тензиите со кои беше проследено неговото донесување во февруари, Јовески не очекува опструкции во неговата примена.