Од Обединетите нации соопштија дека ќе биде потребно време за надминување на ситуацијата со гладот во Газа и уште еднаш го повикаа Израел да ги отвори сите гранични премини
Светската здравствена организација (СЗО) соопшти дека имало мало подобрување во количините на помош што влегуваат во Газа откако стапи во сила прекинот на огнот помеѓу Израел и Хамас, како и оти нема видливо намалување на гладот што беше констатирана во Појасот од страна на Обединетите нации (ОН), пренесува британски „Гардијан“.
Имено, генералниот директор на СЗО, Теодрос Аданом Гебрејесус, вчера во изјава за новинарите рече дека ситуацијата со помошта во Газа останува катастрофална бидејќи сè уште нема доволно храна за луѓето во Појасот.
„Ситуацијата сè уште останува катастрофална затоа што помошта што влегува не е доволна… нема намалување на гладот затоа што нема доволно храна“,
изјави тој.
Еден ден претходно, односно во средата, Меѓународниот суд на правдата на ОН во Хаг соопшти дека Тел Авив ги прекршува своите меѓународни обврски со ограничувањата што ги спроведува изминатите две години.
Во своето мислење, највисокиот суд на ОН, исто така, алармира дека нивоата на помош што влегуваат во Појасот и понатаму остануваат несоодветни во однос на ситуацијата на терен.
Пред една недела Светската програма за храна на Обединетите нации соопшти дека откако стапи во сила прекинот на огнот дневно во Газа внесува околу 560 тони храна, што е под потребни количини. Пред една недела Светската програма за храна (WFP) на ОН изјави дека во просек донела околу 560 тони храна дневно во Газа откако започна прекинот на огнот, но сепак е под потребното. Портпаролката Абир Етефа изјави:
„Сè уште сме под она што ни треба, но стигнуваме до таму… Прекинот на огнот отвори мал прозорец на можности, а Светската програма за храна брза за да ја зголеми помошта во храна“,
изјави портпаролката на Светската програма за храна на ОН, Абир Етафа.
За време на војната со Хамас во Газа, Израел ги затвори граничните премини за влез и излез во Појасот блокирајќи ја, меѓу другото, и испораката на хуманитарна помош за околу два милиони жители на енклавата, што предизвика глад во делови од неа.
Од Обединетите нации соопштија дека ќе биде потребно време за надминување на ситуацијата со гладот во Газа и уште еднаш го повикаа Израел да ги отвори сите гранични премини.
Инаку, договорот за прекин на огнот, кој стапи на сила на 10 октомври, а е дел од опширниот мировен план на американскиот претседател Доналд Трамп, се најде на стаклени нозе минатата недела, по смртоносните насилство во Газа и меѓусебните обвинувања од страна на Израел и Хамас за негово кршење.
Дополнително, закана за прекинот на огнот и за мировниот план за Газа се и законите што ги разгледува израелскиот парламент – Кнесет, а кои се насочени кон проширување на израелскиот суверенитет на окупираниот Западен Брег.