На овие избори имаме враќање на олигархијата, Скопје ќе го правеле Струмица, клановски да се поделат за да има за таа тесна клика, рече Мицкоски, на митинг во Бутел
Власта наликува на стар автомобил пред ремонт. Велат дека ќе го однесат на натпревар на „формула 1“, каде што ќе победи, а не е способен да се придвижи на локална маалска трка. Маслото е растечено, моторот пред зарибување, а новата боја со која го префарбурваат и не убедуваат дека е најдобар постепено распукува и бледнее, рече лидерот на ВМРО-ДПМНЕ, Христијан Мицкоски, на денешниот митинг во општина Бутел.
Тој, исто така, оцени дека СДСМ за скопските општини нуди стари и истрошени кадри за градоначалници.
„Повеќето се стари градоначалници кои не направија ништо, а онаму каде што смени по некој задолжително тоа е син на некој профитер од транзицијата. Ако во 1990-тите владееше олигархијата на СДСМ, сега Заев ги става нивните деца да се борат за функции и да заработуваат на потта на работникот. Така во Аеродром е синот од стеблото Филиповци, кои управуваа со транзицијата. Таткото, поранешен пратеник и директор на аеродромите во Македонија, чичкото поранешен министер за економија-дел од приватизацијата, а другиот чичко еден од директорите на ОХИС-компанија која знаеме како заврши. Таткото на градоначалникот на Бутел, Велимир Смилевски, е еден од директорите на ‘Жито Лукс’, кој го пропаднаа. Кандидатот за градоначалник на Центар е син на директорот на Државниот завод за статистика, Дончо Герасимовски, кој го намести пописот во 2002 година. Тој, пак, на Ѓорче Петров, Александар Наумовски, син на Бранко Наумовски, народен правобранител во 1990-тите,потоа претседател на Уставниот суд. Кандидатот, пак, за градоначалник на Кисела Вода, син на Зоре Темелковски, еден на најбогатите бизнисмени со капитал од 1990-тите и пратеник на СДСМ од тоа време. На овие избори имаме враќање на олигархијата. Скопје ќе го правеле Струмица, клановски да се поделат за да има за таа тесна клика“,
рече Мицкоски од Бутел.