Соодветно на статутарните промени што беа донесени лани, а со кои партијата, практично, се ребрендира, сега црвената боја доминира на новите новите (електронски) членски книшки
Црвена заднина, на која со бела боја е испишано СДСМ… Така изгледаат новите членски книшки на владејачката партија.
За разлика од старите членски книшки, со неколку страници и со сина корица, на која се втиснати жолта ѕвезда и црвена роза, кои беа доскорашните симболи на партијата, новите партиски книшки не само што се црвено-бели туку, како што велат од партијата, се електронски и персонализирани.
Со нив, членството на СДСМ ќе се идентификува при гласањето на првите непосредни внатрепартиски избори за претседател, кои ќе се одржат в недела.
„Новите персонализирани електронски картички веќе се во рацете на членовите на СДСМ. Со помош на новите електронски картички и документ за идентификација, активно регистрираните членови ќе гласаат в недела, на 21 март, на првите директни внатрепартиски избори за избор на претседател на СДСМ“,
објавија од СДСМ.
Премиерот Зоран Заев, кој осум години е на чело на СДСМ, е единствениот кандидат за уште еден мандат на чело на партијата, на изборите в недела.
По неодамнешната постапка за реевиденција и за ажурирање на членството, СДСМ, како што е соопштено, брои над 80 илјади члена. Повеќе од 70 илјади од членовите што го ажурирале членството се пријавиле за гласање на првите внатрепартиски избори.
На дигиталниот конгрес на СДСМ, кој се одржа лани во октомври, беа донесени неколку измени на статутот. Тогаш, меѓу другото, се смени моделот за избор на лидер на партијата, а заштитен знак стана црвената боја, по примерот на повеќето сестрински партии од Партијата на европските социјалисти.