Со новите измени, фирмите што аплицираат за финансиска помош од државата имаат право да отпуштаат работници и тоа: малите и микрокомпании можат да го намалат бројот на вработени за 15 проценти, средните за 10, а големите за 5 проценти
По многубројните критики во јавноста за новите услови за финансиска помош на приватниот сектор, со кои право на минимална плата за нивните вработени од државата ќе може да добијат и фирмите што отпуштиле работници, со реакција излезе министерката за финансии Нина Ангеловска.
На својот фесбук-профил таа уште еднаш ги објаснува критериумите за аплицирање за помош од државата од 14 500 денари по вработен и тврди дека уредбата е изменета со цел да се спасат работни места.
„Неколку работи што оваа промена значи во пракса: Фирмите кои отпуштиле повеќе од овие дозволени лимити во март може да ги вратат работниците кои ги отпуштиле назад за да ја користат мерката. Во спротивно, нема да ја користат; Бројот на вработени кои треба да се задржи се однесува на сите работници – и на неопределено и на определено. Споредбата во бројот на вработени се прави во однос на бројот на вработени од март; Работодавачите имаат привремени работници на кои им истекуваат договорите – и во нормални услови нивниот работен ангажман би престанал. Ако немаат потреба и не можат да го задржат секако работникот кој свесно бил ангажниран на неколку месеци месеци или сезонски оваа флексибилност го адресира ова прашање; Има случаи каде што доаѓа до прекин на работен однос поради сезонски карактер, поради заминување на самиот вработен и слично. И тоа е земено предвид“,
објаснува Ангеловска.
Министерката посочува дека доколку не постои оваа флексибилност, ризикот од отпуштање на поголем број работници е поголем во услови ако работодавачите не ја користат воопшто мерката.
„Значи, се стимулираат и се овозможува компаниите да ги задржат работниците кои инаку би биле во ризик да изгубат работно место и дополнително да можат да исплаќаат редовни плати и во вакви услови или барем пристојни плати“,
додава Ангеловска.
Со новите измени малите и микрокомпании можат да го намалат бројот на вработени за 15 проценти, средните за 10, а големите за 5 проценти. Претходно, пак, услов за добивање финансиска помош беше фирмите да го задржат истиот број вработени до септември, а набрзо овој период беше намален до јуни.
Синдикати и здруженија бараат стопирање на измените на уредбата
Новите критериуми што денеска ги презентираше Ангеловска побудија револт кај синдикатите и здруженијата за работнички права.
Во заедничко писмо тие побараа итно да се стопира процесот на измена на Уредбата за финансиска поддршка на работодавачите, посочувајќи дека доколку мерката се реализира десетици илјади граѓани ќе останат без работа.
„Срамно е влада која се нарекува социјалдемократска и која треба да се грижи пред сè за сиромашните и работниците да најавува вакви мерки, особено на два дена пред Први мај, Меѓународниот ден на трудот, што го сметаме за непочитување на овој празник и за навреда на работничките и работниците. Не смее да се заборави дека средствата од кои се финансираат овие мерки доаѓаат од даночните обврзници, односно се пари на сите граѓани на оваа држава, па затоа треба да се трошат за доброто на сите, а не само за доброто на одредени групи моќници. Потсетуваме и дека Владата веќе еднаш ја смени оваа уредба, скратувајќи го рокот за неотпуштање работници од септември, на јули, односно, за два месеци“,
се вели во нивното заедничко соопштение.
Синдикатите и здруженијата ја повикаа Ангеловска на одговорност обвинувајќи ја дека се ставила во одбрана на газдите.
Потписници на писмото сe: Сојузот на синдикати на Македонија, Конфедерација на синдикални организации на Македонија, Независниот академски синдикат, Самостојниот синдикат на новинари и медиумски работници, Синдикат на културата на Република Македонија, Синдикат на македонската дипломатска служба, Хелсиншки комитет за човекови права, Здружението „Гласен текстилец“, Левичарското движење „Солидарност“, Асоцијацијата на независната културна сцена ЈАДРО, Здружение на граѓани „Прес ту егзит“-Скопје и Асоцијација „Контрапункт“.