За само една година, односно од април 2021 година вредноста на синдикалната минимална кошничка е зголемена за 4 128 денари, односно 12,14 проценти кога нејзината вредност изнесувала 33 976 денари. Најголемо зголемување, според пресметките на Сојузот на Синдикати на Македонија, е забележано во исхраната, пијалаците и кај превозот
За еден месец, вредноста на синдикалната минимална кошничка е зголемена за 1 337 денари, односно за 3,63 проценти со што нејзината вредност за четиричлено семејство во април годинава изнесува 38 104 денари, покажуваат податоците на Сојузот на синдикати на Македонија (ССМ).
Најмногу пари или 16 458 денари (43,19 проценти) во април биле потребни за храна и пијалаци, по што следуваат трошоците за домување 11 627 денари (30,52 проценти), па за хигиена 2 672 денари или 6,90 отсто.
Според пресметките на ССМ, за превоз на едно четиричлено семејство потребни му биле 3 367 денари или 8,84 проценти, за облека и обувки 2 176 или 5,71 отсто, за култура 1 067 денари или 2,80, додека за одржување на здравје, претходниот месец им биле потребни 778 денари или 2,04 проценти.
„Од месец во месец, драстично се зголемуваат трошоците за живот на едно четиричлено семејно домаќинство, а платите не го следат истиот раст по зголемувањето на минималната плата во март 2022 година. Од претходниот месец март 2022 година кога Синдикалната минимална кошница која ја пресметува ССМ изнесуваше 36 767, истата е зголемена за 1 337 денари односно за 3,63 проценти, а од јануари 2022, кога Синдикалната минимална кошничка изнесуваше 35 811 денари е зголемена за 2 293 денари односно 6.40 отсто“,
велат од ССМ.
За само една година, односно од април 2021 година вредноста на синдикалната минимална кошничка е зголемена за 4 128 денари, односно 12,14 проценти кога нејзината вредност изнесувала 33 976 денари. Најголемо зголемување, според пресметките на Синдикатот, е забележано во исхраната, пијалаците и кај превозот.
„Сојузот на синдикатите на Македонија со право бара зголемување на платите на сите вработени како во јавниот така и во приватниот сектор и покрај евидентните противења на одредени субјекти кои се против зголемување на платите на работниците, а на протестот на 1 Мај, 7 500 работници на улица заедно со ССМ јасно упатија пораката дека зголемените плати им се потребни веднаш“,
посочија од ССМ.
Од Синдикатот очекуваат оваа пресметка на синдикалната минимална кошница, како и зголемувањето на трошоците за живот да бидат будење за сите работодавци, локалната и централната власт и како што додаваат веднаш да пристапат кон зголемување на платите на работниците согласно порастот на минималната плата и да ги зголемат платите за најмалку 2806 денари во нето на секој работник.