Професорката Гордана Силјановска-Давкова се пожали дека во стенограмите од нејзиното излагање на јавната расправа во Собранието за законот за јавно обвинителство бил избришан зборот „рекет“. Од законодавниот дом, пак, ја демантираат посочувајќи дека никој ниту интервенирал ниту се осмелил на такво нешто туку дека можеби одредени зборови не се слушале добро на снимките.
„Погледнете ги стенограмски белешки од јавната расправа на тема: ,Јавното обвинителство како ефикасен орган во борба против корупцијата“ од 28.01.2020 година. Кај моето излагање наместо зборот ,рекет’, има долго тире, како симбол за ,рекетирање што тече’?! Уште една манифестација на хибриден режим!“,
напиша Силјановска на Фејсбук.
Наспроти ова, во реакцијата од Собранието посочуваат дека можеби зборови од излагањето не се слушнале и затоа не се напишани. Велат дека на јавната расправа имало огромен интерес, па во салата присуствувале заинтересирани пратеници, екпсерти, професори…
„Согласно досегашната пракса, стенограмите од јавните расправи се прават од аудио-материјал и во оној дел каде зборовите се неразбирливи или поради врева не може добро да се чујат, се остава празна линија. Со оглед на интересот за темата салата ,Борис Трајковски’ беше преполна. Поради вревата се случило одреден момент од дискусијата на говорниците да не се слуша убаво. Поради тоа службите оставиле празен простор, токму со цел да не интервенираат во содржината на говорот“,
велат од Собранието.
Оттаму посочуваат дека поради итноста од подготовката на текстот за законот за јавно обвинителство, нивните служби за само два дена ја организирале јавната расправа и потоа за исклучително кус период ги подготвиле стенограмите. Затоа, сметаат, дека обвинувањата од Силјаноска не се коректни.
„Навистина не е коректно и е непрофесионално да се изведуваат погрешни заклучоци и да се обвинува во јавноста за намерна интервенција во стенограмите од говорот на професорката Силјановска-Давкова, без притоа таа да направи обид да се консултира Собранието за прво да добие информација, а потоа да изнесува заклучоци. Собранието е транспарентна институција отворена за граѓаните во секое време. Ја повикуваме професорката Силјановска-Давкова да дојде во Собранието за да се увери дека не станува збор за интервенција“,
велат од законодавниот дом.