„Мора ние, јас, оние кои ќе бидат на функции, да се обидеме да ставиме крај на балканизацијата, да се обидеме да помагаме едни на други. Не можете во политика со емоции да се однесувате, мора рационално. Мора да почнеме меѓу себе да се разбираме, да се помагаме, да не посегаме кон вето, туку кон поддршка“
Гордана Силјановска-Давкова, која извесно е дека ќе биде новиот и прва жена претседател, на прес-конференција се заблагодари на граѓаните за отпорноста на политичкиот притисок и повиците за бојкот.
Меѓу другото, Силјановска-Давкова рече дека во својот претседателски кабинет ќе се опкружи со жени слични на себе и со тоа ќе го започне реформскиот процес.
„Мојата најголема честитка е до граѓаните. Искрено си се прашувам неколку саати со што ја заслужив оваа чест. Јас знам дека се подготвував, дека се посветив на кампањата, дека го зборував она што го мислам, а не она што треба да го кажам, но наградата е непроценлива за мене. Тоа значи огромна одговорност. Зошто честитки за граѓаните? Затоа што покажаа граѓанска отпорност на притисоците. Оти да повикувате на бојкот е партиски и политички притисок. Да одите по домовите со списоци е политички и партиски притисок, значи се одважија македонските граѓани без разлика на етничката, верската, политичката, религиозната положба. И се одважија граѓаните“,
рече идниот претседател на државата.
Таа смета дека е вистинскиот избор и тоа што по првпат жена ќе биде претседател е инспирација за умните жени во Македонија.
„Држете ме за збор, кога ќе се опкружам со жени слични на мене, жени по моделот на Вацлав Хавел: свои, стамени, субверзивни, кои можат да искажат став и да го бранат, тоа е голем исчекор и тоа е за мене реформски чекор. Реформски чекор исто така затоа што многу партии, меѓу кои и новопојавени, навистина политички настапија. Мислам на логиката опозиција да поддржи опозиција оти оној кој е на власт, се разбира е полтичика мета на останатите. Не повиквуваа на бојкот, не сатанизираа, туку оставија простор за преговори и договори“,
рече Силјановска-Давкова.
Прокоментира и за дебатите што ги имаа во пресрет на вториот претседателски круг со Стево Пендаровски и рече дека покажале елемент на државнички однос, нешто што не е видено во последните 30 години.
Силјановска-Давкова исто така порача дека ќе биде претседателка на сите граѓаните без разлика на етничката и политичката припадност, а дека ќе ги заживее народните канцеларии за да може да разговара со граѓаните.
Таа тврди дека гласовите што ги доби воопшто не се базираат на национализам.
„Не се согласувам со тезата дека гласовите сме ги добиле, сум ги добила, поради набој на национализам. Јас постојано велам – кога велам нација, мислам на граѓани. Во тимот имав и други етникуми и ќе ги вклучам во кабинетот. Тоа се луѓе со докторати, знаење, признанија. Впрочем не попусто ја преведов програмата на сите јазици. Значи ова не е време за поделби, за фалби, за триумфализам. Мора ние, јас, оние кои ќе бидат на функции, да се обидеме да ставиме крај на балканизацијата, да се обидеме да помагаме едни на други. Не можете во политика со емоции да се однесувате, мора рационално. Мора да почнеме меѓу себе да се разбираме, да се помагаме, да не посегаме кон вето, туку кон поддршка. Прво патиштата водат кон Балканот, а тука секако е и Брисел. Знам дека ќе направам сè за да ги бранам државните и националните интереси“,
рече идниот претседател Гордана Силјановска-Давкова.