Во обраќањето на годинашната средба на процесот „Брдо Бриони“, претседателката укажала на неодржливоста од предолгото чекање на земјите од Западен Балкан за старт на евроинтеграцискиот процес, како и насушната потреба за проширување на ЕУ со сите европски држави со цел јакнење на улогата на Унијата и зголемување на отпорноста кон трети влијанија
Цинизам и хипокризија е од некого да барате да биде отпорен на трети влијанија оставајќи го пред портите на Европската Унија – порача претседателката Гордана Сиљановска-Давкова во обраќањето на годинашната средба на земјите учеснички во процесот „Брдо Бриони“ што се одржа во Драч, Албанија.
Шефицата на државата во оваа смисла укажала на неодржливоста од предолгото чекање на земјите од Западен Балкан за старт на евроинтеграцискиот процес, како и насушната потреба за проширување на ЕУ со сите европски држави со цел јакнење на улогата на Унијата и зголемување на отпорноста кон трети влијанија.
„Верувам во добрата волја, верувам во добрите намери, верувам во посветеноста на Хрватска и Словенија на процесот и нивната посебна одговорност кон регионот и неговото забрзано чекорење кон ЕУ“,
порачала претседателката.
Иницијатори на процесот „Брдо-Бриони“ на кој учествува македонската претседателка се Хрватска и Словенија. Покрај С Македонија, во процесот вклучени се и Црна Гора, Србија, Албанија, Босна и Херцеговина и Косово.
Претседателката потенцирала дека годинава, за разлика од лани, Декларацијата е усвоена со консензус на лидерите на земјите учеснички во „Брдо Бриони“, додавајќи дека соработката е неопходна заради решавање на заедничките проблеми како егзодусот на младите, опасноста од стагнирање на економијата и надминување на безбедносните предизвици.