„Да, граѓаните се за тоа, но како што рече претседателот на Хрватска, човек мора да мери понекогаш, да се соочи со прашањето дали досегашните отстапки довеле до исчекор и дали ова е крај на отстапувањата по кои ние станавме препознатливи или пак нема. Впрочем, во Договорот за пријателство и добрососедство нема во ниту еден член и одредба која вели дека треба да посегнеме по уставните измени“, рече претседателката на државата одговарајќи на новинарско прашање на заедничката прес-конференција со својот хрватски колега, Милановиќ
Има нешта за кои може да се преговара бидејќи се рационални и затоа што се врзани за мерит системот, но има нешта за кои не можете да ги исклучите емоциите и тогаш тоа е ирационално, како љубовта, рече претседателката на државата, Гордана Сиљановска-Давкова на заедничката прес-конференција со хрватскиот колега, Зоран Милановиќ кој е во официјална посета на земјава.
Сиљановска-Давкова ова го кажа во нејзиниот одговор на новинарско прашање дали поддршката на граѓаните за членство на С Македонија е сè уште поголема од 70 проценти, а во контекст на блокадата од Бугарија на евроинтегративниот пат.
Претседателката категорично рече дека граѓаните остануваат посветени на оваа определба и дека како држава сакаме да го комплетираме патот кон Унијата, која трае 20 години.
Таа како изворедна ја оцени хармонизацијата на македонското со европското законодавство, додавајќи дека сите анкети покажуваат оти е нормално и политички да влеземе во ЕУ, бидејќи, како што кажа географски, историски и културно отсекогаш сме биле дел од Унијата.
Сепак, таа како неодржлива ја оцени состојбата во која се наоѓа земјава на евроинтегративниот пат, и тоа, како што посочи не говори само за нас, туку и за кредибилитетот и интегритетот на Унијата во една од највжаните области – проширувањето.
„Логично е ако сте добиле речиси 20-тина позитивни извештаи од Европскиот парламент и Европската комисија, дека тие се сериозни и дека имало причина за препораката, но Советот значи велел „не“ на толку многу „да“, не заради неисполнувањето на Копенхашките критериуми, туку заради прашања што на некој начин значат и бараат ревизија на историјата, и покрај тоа што знам дека многу интелектуалци од просторите на бивша Југославија повикуваа на опасноста од ревизија на историјата“,
рече Сиљановска-Давкова.
Затоа, како што наведе, граѓаните сè уште знаат дека она што било искрена и јасно определена заложба уште на Самитот во Солун, нелогично е да се врати назад после 20 години.
„Да, граѓаните се за тоа, но како што рече претседателот на Хрватска, човек мора да мери понекогаш, да се соочи со прашањето дали досегашните отстапки довеле до исчекор и дали ова е крај на отстапувањата по кои ние станавме препознатливи или пак нема. Впрочем, во Договорот за пријателство и добрососедство нема во ниту еден член и одредба која вели дека треба да посегнеме по уставните измени“,
кажа претседателката на државата.
Таа во опширниот одговор на прашањето се осврна и на Преспанскиот договор, правејќи корелација со проблемот со Бугарија и работата на историските комисии на двете држави. Во овој контекст, Сиљановска-Давкова го постави и прашањето за што разговараат тие, бидејќи според она што, според неа е напишано во Преспанскиот договор, ги става ад акта прашањата за културата и јазикот.
„Денеска повторно го посочив Преспанскиот договор, односно членот 7 став 1, во којшто се вели дека името Македонија за втората страна таа безимената, во правото секој знае без титулар нема договор, ама еве и таков договор има, значи означува територија народ со сопствена историја култура и јазик. За што разговараат комисиите бугарско-македонската? За историја, култура, па и за јазик. Во таа смисла, споменав за „pacta sunt servanda“, во Договорот нема такво нешто. Прашање е сега дали можете вие протокол или записник да третирате како извор на право во Преговарачката рамка и да треба тоа да го спроведувате. Значи ако е тоа така напишано во Преспанскиот договор тогаш прашањето историјата за културата и јазикот е ад акта, значи тоа е апсолвирано прашање. И кога ова го тврдам секогаш одам на преамбулата на Лисабонскиот договор, на Договорот за ЕУ, на Повелбата за фундаменталните права на ЕУ. Таму јасно пишува дека ЕУ ќе го почитува националниот и културниот идентитет. Прептоставувам не само на членките, туку на сите држави, оти тоа е логично, дигнитетот и интигритетот. Понатаму уставните и политичките структури. ЕУ ја потпиша повелбата на ОН, таму е правото на самопределување. Низ таа призма гледам“,
рече претседателката.
На прашањето што очекува од претстојните посети на претседателот на Европскиот совет, Антонио Кошта и подоцна на еврокомесарката за проширување Марта Кос на Скопје најавени за овој месец и дали овие посети ќе значат значат придвижување на процесот, Сиљановска Давкова рече дека не може да го предвиди тоа и дека првин сака да ги чуе двајцата европски функционери, па потоа ќе го изложи својот став.
„Сакам прво да ги чујам обајцата, бидејќи јас го изложив мојот став, тој е тој. Значи се разбира дека ќе разговараме за можни излезни решенија од состојбата во која што се наоѓаме. Ова навистина е неодржлива состојба која што не говори само за нас, туку реков и за кредибилитетот и интегритетот на ЕУ во една од најважните области, областа на проширувањето. Значи нека дојдат веројатно, по разговорот ќе имам можност врз основа на чуеното, врз основа на укажаното да го изнесам мојот став, а се разбира и тие можат да ви кажат што сме разговарале и како гледаат на состојбата за која денеска јас зборував“,
рече претседателката Сиљановска-Давкова на заедничката прес-конференција со хрватскиот претседател, Зоран Милановиќ.