Таа, исто така, посочи дека во Европа не постои, односно „аки комунитерот“ (европското заедничко законодавство) не се однесува и на јазичната политика и дека државите имаат различен однос кон почитувањето на нормите
Претседателката Гордана Сиљановска-Давкова смета дека е добро што во Уставниот суд ќе има јавна расправа за Законот за употреба на јазиците, на која ќе можат да ги изнесат своите ставови не само подносителите, туку и критичарите на законот.
Таа нагласи дека актуелниот состав на Уставниот суд, во кој има четворица доктори на науки и тројца професори, е состав кој умее да измери и оти очекува судот да ги има предвид сите прашања.
Во однос на „пријателското мислење“ на Венецијанската комисија за Законот за употреба на јазиците, Сиљановска-Давкова рече дека не го прочитала, но верува дека тоа нема да излезе надвор од претходното мислење на Комисијата за овој закон, за кое таа и дебатирала.
„Ако мислите на она што во правото се мисли на ‘пријателско мислење’, што е испратено до Уставниот суд, не. Тоа мислење не сум го прочитала, мислам дека не е ниту објавено. Но, сум го прочитала мислењето на Венецијанската комисија за Законот за употреба на јазиците, мислам дури и сум дебатирала за него и го знам тоа мислење. Верувам дека Венецијанската комисија нема да излезе надвор од тоа мислење“,
изјави Сиљановска-Давкова по Свечената академија во МАНУ по повод 80 години од кодификацијата на македонскиот стандарден јазик.
Претседателката додаде дека Венецијанската комисија ќе има и свој претставник на јавната расправа пред Уставниот суд.
Сиљановска-Давкова потенцираше дека не смее однапред да се предвидува одлуката на Уставниот суд, од истите причини како и за редовното судство.
Таа вели дека Уставниот суд е „четврта власт“ која има клучна улога во демократските процеси преку одлучување за судир на надлежности и оценување на закони и други општи акти.
„Мислам дека во овој состав на Уставниот суд има четворица доктори на науки, тројца професори и дека е еден состав што умее да измери и мислам дека однапред не смееме да носиме заклучоци. Се разбира Уставниот суд до што ќе се држи. Ќе се држи до Уставот, исто така, ќе се држи и до компаративната европска практика“,
рече Сиљановска-Давкова.
Таа, исто така, посочи дека во Европа не постои, односно „аки комунитерот“ (европското заедничко законодавство) не се однесува и на јазичната политика и дека државите имаат различен однос кон почитувањето на нормите.
Клучни документи во оваа област, според неа, се Рамковната конвенција за заштита на правата на малцинствата и Конвенцијата за регионални и малцински јазици, до кои Уставниот суд, како што рече, ќе се држи, како и до другите мислења на Венецијанската комисија.
Во врска со интерпетацијата на некои политички партии дека најавата на претседателот на Уставниот суд за носење одлука по локалните избори претставува „координирање меѓу политиката и Уставниот суд“, Сиљановска-Давкова изрази спротивно мислење.
Според неа, претседателот на Уставниот суд сака да ја избегне политизацијата на ова прашање пред изборите и да овозможи мирно решавање по нивното завршување.
„Ако добро го разбрав, тој сака да ја избегне опасноста од политизација на прашањето, што ќе се случи, а редовно се случува пред сите избори. Впрочем кај нас и многу тешко е да определите за какви избори се работи. Затоа сака да ги остави локалните избори да протечат на мир, значи во политички манир нема пострасен момент од изборите, а потоа по завршувањето да можат тие на мир да решат. Не е непознато да има расправа, а потоа да се носи одлука. Мислам дека ќе ги мерат сите критериуми, па и специфичните“,
изјави Сиљановска-Давкова.
Претседателот на Уставниот суд, Дарко Костадиновски во телевизиско гостување рече дека со цел да се избегне политизација и етнизација, неговата проценка е дека конечната одлука за Законот за јазиците ќе биде донесена после локалните избори.
Коментирајќи ја претстојната подготвителна седница за Законот за употреба на јазиците, рече дека таа ќе се одржи на 19 јуни, како и дека никој не треба да стравува од одлуките на судот, зашто не станува збор за напад на нечии права.
Ваквата изјава на Костадоновски предизвика реакција од поранешниот министер за надворешни работи и потпретседател на Демократската унија за интеграција (ДУИ), Бујар Османи кој изрази сомнеж дека локалните избори во октомври ќе бидат претворени во референдум за албанскиот јазик и за еднаквост во државата.
Според Османи, одамна се зборува дека Владата му наредила на Уставниот суд веднаш по октомвриските избори да го укине Законот за јазици, за, како што вели тој, да не му наштети на нивниот албански проект.